ئۆپەراسیۆنە هاوبەشەکان : هەموو هەوڵێک دەدەین داعش لە سنووری سووریاوە دزە نەکاتە ناو عێراق

 

ئاڤا نیوز

فەرماندەی ئۆپەراسیۆنە هاوبەشەکانی عێراق ڕەتیدەکاتەوە هیچ دزەکردن یان گرژییەک لە سنووری سووریا دروستبووبێت، جەختیش دەکاتەوە کە ئاسایشی سنوور بە تەواوی پارێزراوە.

چیرۆکی سەرەکی: سنووری سووریا خاڵی نیگەرانی عێراقە و بەغدا باوەڕی وایە بوونی دەیان هەزار ڕاگیراوی داعش لە زیندانەکانی باکووری سووریا هەڕەشەن لەسەر سنوورەکانیی، بۆیەش ڕێکاری ئەمنیی توندی گرتووەتەبەر.

ڕاگەیێنراوی فەرمی: فەرماندەی ئۆپەراسیۆنە هاوبەشەکانی عێراق لە ڕاگەیێنراوێکدا ڕایگەیاند:

٠ هیچ دزەکردن یان پێکدادانێک بەدرێژایی سنووری عێراق و سووریا نەبووە.

٠ هێزە ئەمنییەکانمان بەهێزەوە ئاسایشی سنوورەکان دەپارێزن، بۆ ئەو مەبەستەش وەک یەک تیم کار دەکەن و هەموو کەرەستەیەکی پێویستیشیان لەبەردەستە.

ئەمەش بزانە: شەوی ڕابردوو لەڕۆژهەڵاتی سەلاحەددین کوژرانی چوار "تیرۆرست" ڕاگەیێنرا کە دوانیان پشتێنی مینڕێژکراوییان بەستبوو، هاوکات لە ئەنباریش حەشارگەیەکی پڕ لە چەک و کەرەستەی داعش دۆزرایەوە و لەناوبرا.