یەکێتیی ئەوروپا لەبارەی دەستگیرکردنی ئیمامئۆغلو هاتە دەنگ

ئاڤا نیوز

 

سەرۆکی کۆمیسیۆنی یەکێتیی ئەوروپا لەبارەی دەستگیرکردنی ئەکرەم ئیمامئۆغلو هاتە دەنگ و دەڵێت، دەبێت ئەنکەرە پابەند بێت بە ڕێزگرتن لە مافی بەرپرسە هەڵبژێردراوەکان.

وێنە گەورەکە: کاردانەوە ناوخۆیی و نێودەوڵەتییەکان بەرامبەر دەستگیرکردنی ئەکرەم ئیمامئۆغڵو، سەرۆکی گەورە شارەوانی ئەستەنبووڵ بەردەوامە؛ شەوی ڕابردوو سەدان هەزار کەس ڕژانە شەقامەکانی ئیستەنبووڵ و داوای ئازادکردنی ئیمامئۆغڵویان کرد. هاوکات لایخۆیەوە ئورسولا ڤۆن دێر لاین، سەرۆکی  کۆمیسیۆنی یەکێتیی ئەوروپا دەستگیرکردنەکەی بە "نیگەرانکەر" ناوبرد و داوای لە ئەنکەرە کرد ڕێز لە بەها دیموکراسییەکان بگرێت.

 

لێدوانی فەرمی: ڤۆن دێر لاین لە چاوپێکەوتنێکیدا لەگەڵ ڕۆژنامەنووسان جەختی لەوە کردەوە، پێویستە تورکیا پابەند بێت بە بەها دیموکراسییەکان، بەتایبەت مافی بەرپرسانی هەڵبژێردراو. گوتیشی، ئێمە دەمانەوێت تورکیا پەیوەندی بە ئەوروپا بمێنێتەوە، بەڵام ئەمە پێویستی بە پابەندبوونێکی ڕوون و ڕێوشوێنە دیموکراسیەکانە و گرنگە تورکیا ڕێز لەم بنەما بنچینەییانە بگرێت.

 

ئەوەی پێویستە بیزانیت: سەرلەبەیانی ڕۆژی 19ـی ئازار سەرۆکی شارەوانی ئیستەنبووڵ به تۆمەتی گەندەڵی دارایی و پشتیوانیکردن لە تیرۆر دەستگیرکرا؛ هاوکات ئیمامئۆغلو لە ماوەکانی ڕابردوو لە تۆمارێکی ڤیدیۆییدا خۆی وەک کاندید بۆ هەڵبژاردنی داهاتووی سەرۆکایەتیی تورکیا ڕایگەیاند.