وەزارەتی كار دەنگۆی ڕێگریکردن لە کردنەوەی سەنتەرێکی ئۆتیزم ڕەت دەكاتەوە

ئاڤا نیوز

وەزارەتی كار و كاروباری كۆمەڵایەتی دەنگۆیەك سەبارەت بە ڕێگریكردن لە كردنەوەی سەنتەرێكی ئۆتیزم ڕەت دەكاتەوە.

وێنە گەورەكە: بەمەبەستی چارەسەركردنی منداڵانی ئۆتیزم، حكومەتی هەرێمی كوردستان لە شار و شارۆچكەكانی هەرێمی كوردستان ژمارەیەك سەنتەری كردووەتەوە و بە هۆی زۆریی ژمارەی نەخۆشانی ئۆتیزم، داوای زیاتركردنی ژمارەی سەنتەرەكان دەكرێت و بەپێی پلانی وەزارەتی كار لە داهاتوودا ژمارەی سەنتەرەكان زیاتر دەكرێن.

بڵاوكراوەی فەرمی: وەزارەتی كار و كاروباری كۆمەڵایەتی ڕایگەیاند: هەموو ئەو دەنگۆیانە ڕەت دەکەینەوە کە باس لە ڕێگریکردنی وەزارەتەکەمان  لە کردنەوەی سەنتەری ئۆتیزمی حکومی لە قەزای کەلار دەکەن، ئێمە بیناو سەرجەم پێداویستییەکانی سەنتەری ئۆتیزمی حکومیمان لە قەزای کەلار ئامادە کردووە و وەزیری کار چەند جارێک داوای لە ئەنجوومەنی وەزیران کردووە بۆ دامەزراندنی فەرمانبەر و ستافی تایبەت.

زانیاریی زیاتر: وەزارەتی كار لە ڕوونكردنەوەكەیدا ئاماژەی بە ئەوە داوە كە ئێستا لە هەوڵدان بۆ ئەوەی لە داهاتوویەکی نزیکدا سەنتەری ئۆتیزمی حکومی بکرێتەوە، لە چوارچێوەی یاساو ڕێنماییەکان.