حکومەتی هەرێمی کوردستان لیژنەیەک بۆ گەڕاندنەوەی گەشتیاران پێکدەهێنێت

ئاڤا نیوز

حكومەتی هەرێمی كوردستان لیژنەیەكی هاوبەش لە فەرمانگەی پەیوەندییەكانی دەرەوە و وەزارەتی ناوخۆ پێكدەهێنێت، بە مەبەستی گەڕاندنەوەی هەموو ئەو هاووڵاتی و لایەنە فەرمییانەی كە بەهۆی گرژییەكانی ناوچەكە لە وڵاتان گیریان خواردووە، لیژنەكە كار بۆ ئەوە دەكات لە نزیكترین كاتدا هاووڵاتیان بگەڕێندرێنەوە هەرێمی كوردستان.

 

ئەوەی پێویستە بیزانیت: بەهۆی هەڵكشانی شەڕ و گرژییەكانی ناوچەكە، ئاسمانی عێراق داخرا و سەرجەم گەشتە ئاسمانییەكانیش ڕاگیران، ئەمەش گرفتی زۆری بۆ ئەو هاووڵاتیانە دروستكردووە كە لە بەشێك لە وڵاتانی ناوچەكە و جیهان گیریان خواردووە، چ ئەوانەی مەبەستیانە بەڕێگەی ترانزێت بگەڕێنەوە چ ئەوانەشی دانیشتووی هەرێمی كوردستانن.

 

ڕاگەیێنراوی فەرمی: حكومەتی هەرێمی كوردستان ڕایدەگەیەنێت، بە ئەركی خۆی دەزانێت بە هانای هاووڵاتیانی هەرێمی كوردستانەوە بچێت لەكاتی بوونی هەر كێشە و گرفتێك، وەک چۆن لەسەردەمی پەتای کۆڕۆنا و لەکاتی ڕووداوە نەخوازراوەکان هەموو هەوڵێکیدا بۆ گەڕاندنەوەی هاووڵاتیان.

 

چی ڕوودەدات: ئێستا لیژنەی هاوبەشی فەرمانگەی پەیوەندییەكانی دەرەوەی حكومەتی هەرێم لە پەیوەندیدایە بە مەبەستی جێبەجێكردنی ڕێكارەكان بۆ گەڕاندنەوەی هاووڵاتیان بۆ هەرێمی كوردستان لەزووترین كاتدا.