پرۆسەی چەکدانانی پەکەکە لە 10 ڕۆژی داهاتوودا دەستپێدەکات

ئاڤا نیوز

پرۆسەی چەکدانانی پەکەکە لە 10 ڕۆژی داهاتوودا دەستپێدەکات، میت و دەزگای هەواڵگریی عێراق دەستیان بە ئامادەکاری کردووە بۆ ڕێکخستنی شێوازی چەکدانانەکە، پەرلەمانتارێکی دەمپارتی دەڵێت، تورکیا داوای کردووە پرۆسەکە لە هەرێمی کوردستان و بە لایڤ بێت بە بەرچاوی هەموو جیهاندا.

چیرۆکی سەرەکی: بەپێی زانیارییەکانی ئاڤا دەزگای هەواڵگریی تورکیا (میت) و دەزگای هەواڵگریی عێراق بە ئاگاداری  وهەماهەنگیی حکومەتی کوردستان دەستیان بە ئامادەکاری کردووە بۆ ڕێکخستنی شێوازی چەکدانانی پەکەکە.

سەرچاوەیەکی میدیایی نزیک لە پەکەکە بە ئاڤا میدیای گوت: بۆ سەلماندنی نیازپاکی خۆیان، لە 10ڕۆژی یەکەمی مانگی حەوت پەکەکە یەکەم گەڕی چەکدانان جێبەجێ دەکات.

زانیاریی تایبەت: ئاڤا زانیویەتی بۆ ئەم قۆناغە دوو شوێن لە سنووری پارێزگای سلێمانی دەستنیشانکراون، لە قۆناغی یەکەمدا 40 بۆ 100 گەریلا چەکەکانیان دادەنێن، پرۆسەکە بە ئاشکرا و بە ئاگاداریی حکومەتی هەرێمی کوردستان دەبێت. 

ئەو چەکدارانەیشی کە بڕیارە چەک دابنێن، دەگەڕێنەوە شوێنی خۆیان و چەکەکانیشیان دەدرێتە دەست هێزە ئەمنیەکانی سەر بە حکومەتی هەرێمی کوردستان.

ئەم هەنگاوە لەسەر داوای ڕاستەوخۆی عەبدوڵڵا ئۆجەلان، ڕێبەری زیندانیکراوی پەکەکەیە، دوای ئەمەش پەکەکە چاوەڕێی هەنگاوی کرداری دەبێت لەلایەنی تورکیا.

لەلایەکی دیکەوە: لەبارەی پرۆسەی ئاشتی لە ناوخۆی تورکیا بڕیار دراوە کۆمیسیۆنێکی 30 کەسی پێکبهێنرێت بە بەشداری هەموو لایەنە سیاسییەکانی تورکیا و دەست بە هەنگاوی نووسینەوەی دەستووری نوێی تورکیا بکرێت.

پەکەکە داواکارییەکی سەرەکی لە نووسینەوەی ئەم دەستوورەدا هەیە، داوا دەکەن ڕێگە بە بەشێک لەو فەرماندە باڵایانەی پەکەکە بدرێت کە بچنە ناو پرۆسەی سیاسی و لێخۆشبوونیان بۆ دەربکرێت.

لێدوانی فەرمی: محەممەد کەماچ، پەرلەمانتاری دەم پارتی بە ئاڤای ڕاگەیاند، حکومەتی تورکیا داوا دەکات پرۆسەی چەکدانانی پەکەکە بە هەماهەنگی هەواڵگریی تورکیا و عێراق، لە ژێر چاودێری بەغدا و هەولێر بکرێت، بەتایبەتی حکومەتی هەرێمی کوردستان، هەر بۆیە بە ئەگەری 90% پرۆسەی چەکدانانی پەکەکە لە هەرێمی کوردستان دەکرێت، بەڵام دیار نیە کەی و چۆن دەکرێت.
 
پەرلەمانتارەکەی دەم پارتی دەڵێت، حکومەتی تورکیا داوای کردووە پرۆسەی چەکدانانی پەکەکە بە ڤیدیۆ کۆنفرانس بێت، واتا لایڤ بگوازرێتەوە بۆ هەموو جیهان کە گەریلاکانی پەکەکە چۆن چەکەکانیان ڕادەست دەکەن. 

لەبارەی پێکهێنانی لیژنەی پەرلەمانیش بۆ کارکردن لەسەر پرۆسەی ئاشتی. محەممە کەماچ دەڵێت: لەم چەند ڕۆژەدا ئەو پارتانەی فراکسیۆنیان هەیە پێشنیازەکانیان پێشکەش بە پەرلەمان دەکەن  و تا 15-7 تا لیژنەکە پێک دەهێنرێت.

هەنگاوی داهاتوو: دەم پارتی پێشنیازی کردووە ئەو پارتانەی فراکسیۆنیان هەیە کە شەش پارتن، هەر پارتێک پێنج ئەندامیان لە لیژنەکە هەبێت، پەرلەمانتارەکانی دیکەش لەو پارتانەی کە فراکسیۆنیان نییە بەشدار بن.  

باکگراوند: لە چوارچێوەی پرۆسەی ئاشتی و لەسەر داوای عەبدوڵڵا ئۆجەلان، پارتی کرێکارانی کوردستان 'پەکەکە' 12ـەمین کۆنگرەی خۆی لە ڕۆژانی 5 تا 7ـی مانگی پێنجی ئەمساڵ بەست، لە کۆنگرەکەدا پەکەکە کۆتایی بە خەباتی چەکداری هێنا و بڕیاری چەکدانان و خۆ‌هەڵوەشاندنەوەی ڕاگەیاند، بەرپرسیاریێتی قۆناغی داهاتووشی خستە ئەستۆی تورکیا لە زامنکردنی مافەکانی گەلی کورد لە باکووری کوردستان.