ئاڤا زانیاری نوێ لەبارەی هێرشە درۆنییەکەی سەر سلێمانی ئاکشکرا دەکات

ئاڤا نیوز

سەرچاوەیەكی تایبەت چەند زانیارییەك سەبارەت بە ئەو درۆنانەی دوێنی شەو لە سنووری تاسڵوجەی سلێمانی تێكشكێنران و كەوتنە خوارەوە ئاشكرا دەكات و بەپێی زانیارییە تایبەتەكانی ئاڤا میدیاش بەرپرسانی یەكێتی پێیان وایە ئەو هێرشە، هاوشێوەی هێرشەكەی سەر كۆرمۆرە و لەلایەن هەمان هێز و لایەنەوە كراوە.

چیرۆکی سەرەکی: دوێنێ شەو بە دوو درۆنی بۆمبڕێژکراو هێرش کرایە سەر بارەگای یەکەی 70ـی پێشمەرگە و بارەگای دژەتیرۆی سلێمانی لە تاسڵووجە، هەردوو درۆنەکەش دوای 20 خولەک سووڕانەوە بەسەر بارەگاکان لەلایەن هێزە ئەمنییەکان تەقەیان لێ کراوە و تێکشکێنراون.

زانیاریی بەدەستهاتوو: ئامانجیی درۆنەکان ناوچەیەکی ئەمنی بووە لە تاسڵوجە، پێش ئەوەی تەقەیان لێ بکرێت و بخرێنە خوارەوە، نزیکەی 20 خولەک بە ئاسمانی ئەو ناوچەیە سووڕاونەتەوە. .

ئاڤا زانیویەتی قەبارەی درۆنەكان مەترێك بۆ مەترێک و 60 سانتیمەتر بووە. بە هۆی ئەوەی تەقیونەتەوە و سووتاون، هیچ نووسین و ئاماژەیەك لەسەر درۆنەكان دیار نەماونە و ئاڵای هیچ وڵات و لایەنێكی لەسەر نییە، بۆیە نازانرێت بە دڵنیاییەوە هی چ هێز و لایەنێكە،  کێ دروستی کردوون، کێ ئاراستەی کردوون.

چەند بەرپرسێکی یەکێتی، پێیانوایە هێرشەکە هاوشێوەی هێرشەكەی سەر کێڵگەی غازی كۆرمۆرە کە کۆتایی مانگی چواری ئەمساڵ کرا و ئەویش هەر بە درۆن بوو، هێرشەکە لەلایەن هەمان هێز و لایەنەوە كراوە.

لێدوانی تایبەت: سەرچاوەیەكی تایبەت لە هێزە ئەمنییەكانی سلێمانی بە ئاڤای ڕایگەیاند:  بەپێی جۆری ڕووداوەكە وا دەردەكەوێت كە ئەمە تەنیا پەیامێك بووبێت بۆ هێزە ئەمنییەكانی سلێمانی نەك زیانگەیاندنی ڕاستەوخۆ بە هێزەكانی ئەو شوێنە.

لەلایەكی دیكەوە: لیوا ئەحمەد لەتیف، گوتەبێژی هێزەکانی 70 بە ئاڤا میدیای ڕاگەیاند: دوو درۆنەکە بۆمبڕێژكراو بوون و گومان دەكرێت ئامانجەكەیان هێزەكانی 70 بووبێت.

هاوکات سەرچاوەیەکی تایبەت هەر لە هێزەکانی 70ـی یەکێتی بە ئاڤا گوت، تا ئێستا نەزانراوە درۆنەکە کێ و لە کوێ ئاراستەی بارەگامان کراوە.

عەقید سەلام عەبدولخالق، گوتەبێژی دەزگای ئاسایشی هەرێم/ سلێمانی، دوێنێ شەو هەر کەمێک دوای ڕووداوەکە بە ئاڤای گوت:  هەردوو درۆنەكە بۆمبڕێژکراو بوون و لەلایەن هێزە ئەمنییەکان تەقەیان لێ کراوە و تێکشکێنراون.