ئیسرائیل بە ئۆپەراسیۆنی "ئاڵای ڕەش" هێرشی چڕی کردە سەر حووسییەکانی یەمەن

ئاڤا نیوز

سوپای ئیسرائیل، بەرەبەیانی ڕۆژی دووشەممە دەستپێکردنی هێرشی ئاسمانیی چڕی بۆ سەر بەندەری حودەیدە و چەند شوێنێکی دیکە لە پارێزگای حودەیدەی یەمەن ڕاگەیاند، ئەمەش لە چوارچێوەی ئۆپەراسیۆنێکدا بە ناوی "ئاڵای ڕەش".

وێنە گەورەکە: دوای ڕاگرتنی جەنگی لەگەڵ ئێران. ئیسرائیل هێرشەکانی بۆ سەر حووسییەکانی یەمەن چڕ کردووەتەوە و تا ئێستا چەندین پێگە و بنکەی گرنگی ئەو گرووپەی لە ناوچە جیاجیاکانی یەمەن کردووەتە ئامانج.

لێدوانی فەرمی: یسرائیل کاتس، وەزیری بەرگریی ئیسرائیل، ڕایگەیاند هێرشەکان "ئامانجەکانی سەر بە حووسییەکانیان لە بەندەرەکانی حودەیدە، سەلیف و ڕەئس عیسا، جگە لە وێستگەیەکی کارەبا لە یەمەن" کردووەتە ئامانج و جەختیشی کردەوە کە "حووسییەکان باجێکی قورس دەدەن".

هەروەها ئاماژەی بەوەشکرد کە هێزەکانی وڵاتەکەی هێرشیان کردووەتە سەر کەشتیی گالاکسی لیدەر، کە لە کۆتاییەکانی ساڵی ڕابردوودا لەلایەن حوسییەکانەوە دەستی بەسەردا گیرابوو، بۆ چالاکیی تیرۆریستی لە دەریای سووردا بەکاریان دەهێنا".

زانیاریی زیاتر: پێش ئەنجامدانی هێرشەکان، ئەفیخای ئەدرەعی، وتەبێژی سوپای ئیسرائیل، هۆشدارییەکی "بەپەلە"ـی ئاراستەی هاووڵاتیانی مەدەنی و کرێکارانی بەندەرەکانی حودەیدە، ڕەئس عیسا و سەلیف، هەروەها ئەوانەی لە وێستگەی کارەبای حودەیدە بوون کردبوو و داوای لێکردبوون دەستبەجێ ئەو ناوچانە چۆڵ بکەن "بەهۆی ئەو چالاکییە سەربازییانەی کە تێیدا ئەنجام دەدرێن".

ئەم پەرەسەندنە دوای چەند کاتژمێرێک لە هێرشێکی مووشەک بۆ سەر ئیسرائیل دێت کە لە یەمەنەوە ئاراستەکرابوو، ئەمەش نوێترین هێرشە لەو زنجیرە هێرشانەی کە  حووسییەکان لە مانگی تشرینی دووەمی 2023ـەوە دژی ئەو کەشتیانە ئەنجامی دەدەن کە دەڵێن پەیوەندییان بە ئیسرائیل یان ئەمریکاوە هەیە لە دەریای سووردا.

لەلایەکی دیکەوە: وتەبێژی سەربازیی ئەنساروڵڵا (حوسییەکان) ڕایگەیاند: "هێزە ئاسمانییەکانی یەمەن ڕووبەڕووی هێرشی ئیسرائیل بۆ سەر وڵاتەکەمان دەبنەوە."

لەم چوارچێوەیەدا، میدیا ئیسرائیلییەکان ڕایانگەیاند کە "فڕۆکەکانی هێزی ئاسمانی نزیکەی 20 مووشەکی قورسیان ئاراستەی حودەیدە کردووە و هێرشەکە هێشتا بەردەوامە."