هەفتەیەکی داهاتوو ئاو دەگاتە بەشێک لە گەڕەکەکانی هەولێر

ئاڤا نیوز

تاقیکردنەوەی گەیشتنی ئاوی پڕۆژەی فریاگوزاریی خێرای ئاوی هەولێر نزیکە لە تەواوبوون، ئاو گەیشتووەتە وێستگەی سەرەکی دابەشکردن لە سێبیران، دوای خاوێنکردنەوە و تێکردنی کلۆر دابەشدەکرێت بەسەر بەشێکی گەڕەکەکانی شاری هەولێر.

وێنە گەورەکە: بە مەبەستی چارەسەرکردنی کێشەی کەمئاوی بەتایبەت لە وەرزی هاوین لە شاری هەولێر و دەورووبەری، حکومەتی هەرێمی کوردستان پڕۆژەی فریاگوزاریی خێرای ئاوی هەولێری جێبەجێکرد و پڕۆژەکە لە قۆناغەکانی کۆتایی نزیکە لەوەی بە تەواوی بکەوێتە کار.

لێدوانی فەرمی:  ئاری ئەحمەد، بەڕێوەبەری گشتیی ئاو و ئاوەڕۆی هەرێمی کوردستان بە ئاڤای گوت، "لە 15 بۆ 30 ئەم مانگە بەچەند قۆناغێک ئاو دەگات بە گەڕەکەکانی هەولێر، سەرەتا وەک تێست مەودای ڕۆیشتنی ئاوەکە دیاریدەکرێت و دواتر لە وێستگەی سەرەکییەوە دەستەکرێت بە دابەشکردن."

ئەمەش بزانە: ئەو شوێنانەی کە یەکەمجار ئاویان پێدەگات، گەڕەکەکانی دیوی دەرەوەی شەقامی 120 مەترین دواتر ناوچەکانی شەقامی مووسڵی کۆن و نوێ، شەقامی کۆیە، شەقامی مەخموور و شەقامی کۆیەش دەگرێتەوە.

باکگراوند:  پرۆژه‌ى فرياگوزاریی خێراى ئاوى هه‌ولێر بە گوژمەی نزیكەی 480 ملیۆن دۆلار جێبەجێ دەکرێت و به‌ ته‌واوبوونى پرۆژه‌كه،‌ كێشه‌ى كه‌مئاوى له‌ شارى هه‌ولێر به‌ ڕێژه‌ى 100% چاره‌سه‌ر ده‌بێت.