شەمەندەفەری بەغدا، پڕۆژەیەک لەسەر کاغەز

ئاڤا نیوز

سەرەڕای لێدوان و بەڵێنە بەردەوامەکانی حکومەتی عێراق، پڕۆژەی شەمەندەفەری هەڵواسراوی بەغدا، تەنیا لە چوارچێوەی ڕاگەیێنراوە ڕۆژنامەوانییەکان و کۆمەڵێک وێنەی گریمانەییدا ماوەتەوە.

چیرۆکی سەرەکی: بیرۆکەی پڕۆژەی شەمەندەفەری هەڵواسراوی بەغدا بە فەرمی لە ساڵی 2010 دەستی پێکرد و پارێزگای بەغدا لە چوارچێوەی پلانی فراوانکردنی شاردا پڕۆژەکەی گرتە ئەستۆ، لە ساڵی 2011، پارێزگا گرێبەستێکی لەگەڵ کۆمپانیای ئەلستۆمی فەرەنسی واژۆ کرد، کە یەکێکە لە دیارترین کۆمپانیاکانی جیهان لە بواری گواستنەوەدا، بەمەبەستی ئامادەکردنی ڕاوێژ و دیزاینە سەرەتاییەکان، کە دواتر لە ساڵی 2016 پەسەند کران.

شێوازی جێبەجێکردن: دوای تەواوبوونی دیزاینەکان، شاندێکی کۆمپانیا فەرەنسییەکە سەردانی بەغدایان کرد و پێشنیازێکی داراییان خستەڕوو کە بریتی بوو لە پێدانی قەرزێک بە حکومەتی عێراق بە بڕی 2.5 ملیار دۆلار، بەو مەرجەی لە ماوەی 19 ساڵدا بدرێتەوە، بۆ خێراکردنی کارەکانیش ڕێککەوتن لەگەڵ دوو بانکی نێودەوڵەتی، یەکێکیان کۆری و ئەوی دیکەیان فەرەنسی، کرا.

لێدوانی فەرمی: موسەننا ئەلمەعینی، بەڕێوەبەری توێژینەوە و گەشەپێدان لە ئەنجوومەنی پارێزگای بەغدا، ڕایگەیاند: پڕۆژەکە سەرەتا لە دەسەڵاتی پارێزگادا بوو، بەڵام دواتر ڕەوانەی وەزارەتی گواستنەوە و گەیاندن کرا و ڕۆڵی ئەنجوومەنی پارێزگای بەغدا تەنیا بووە چاودێری و یاسادانان.

هۆكاره‌ زانراوه‌كان: دەستەی دەستپاکی عێراق ئاشکرای کرد، هۆکاری وەستانی پڕۆژەکە دەگەڕێتەوە بۆ کەمتەرخەمی لە داڕشتنی پلاندا و تەواونەکردنی نەخشە و دیزاینە هونەرییە بنەڕەتییەکان لەلایەن لایەنە پەیوەندیدارەکانەوە، ئەمەش بووەتە ڕێگرێکی سەرەکی لەبەردەم جێبەجێکردنیدا.

لەلایەکی دیکەوە: زەهرا بەجاری، سەرۆکی پێشووی لیژنەی گواستنەوە و گەیاندن لە پەرلەمان، ڕایگەیاند: هەندێک کەس و لایەن ئاستەنگی بۆ جێبەجێکردنی پرۆژەکە دروست دەکەن، چونکە نەدراوە بەو کۆمپانیایەی ئەوان دەیانویست، لە کاتێکدا کۆمپانیایەکی گەورەی جیهانی وەک سیمنزی ئەڵمانی، کە چەندین پڕۆژەی لە عێراق هەیە، ئامادەیی خۆی بۆ کارکردن لەپڕۆژەکە نیشان دابوو .