لە ماوەی 24 کاتژمێردا لە غەززە بەهۆی هێرشەکانی ئیسرائیل 100 کەس کوژراون

ئاڤا نیوز

سەرچاوە فەڵەستینییەکان ئاشکرایان کرد، بەهۆی بۆردوومانە بەردەوامەکانی سوپای ئیسرائیل لە ماوەی 24 کاتژمێری ڕابردوودا 100 کەس لە کەرتی غەززە کوژراون.

وێنە گەورەکە: سەڕەرای هەوڵە نێودەوڵەتییەکان بۆ ڕاگرتنی هێرشەکانی ئیسرائیل، بەڵام دۆخی مرۆیی کەرتی غەززە بەهۆی بۆردوومان و گەمارۆ بەردەوامەکانی سوپای ئیسرائیل تا دێت خراپتر دەبێت تەنیا لە ماوەی 24 کاتژمێری ڕابردوودا 100 کەس لەو کەرتە کوژراون.

لەلایەکی دیکەوە: هەر بەهۆی گەمارۆکانی سەر کەرتی غەززە و نەگەیشتنی هاوکارییە مرۆییەکان بۆ خەڵکی، تا دێت ژمارەی گیانلەدەستدان بەهۆی برسێتییەوە بەرزتر دەبنەوە، تەنیا لە ماوەی ڕۆژێکدا هەشت کەس لە برسان مردوون.

ژمارەکان وادەڵێن: لە سەرەتای دەستپێکردنی هێرشەکانی ئیسرائیل بۆ سەر کەرتی غەززە لە 7ـی ئۆکتۆبەری ساڵی 2023 تاوەکو ئێستا 61 هەزار و 722 کەس کوژراون و 154 هەزار و 525 کەسی دیکەش برینداربوون، هاوکات 235 کەس بەهۆی برسێتییەوە گیانیان لەدەستداوە کە 106ـیان منداڵن.