میدیا ئیسرائیلییەکان: دۆناڵد ترەمپ سەردانی ئیسرائیل دەکات

ئاڤا نیوز

میدیا ئیسرائیلییەکان بڵاویانکردووەتەوە، سەرۆکی ئەمریکا نیازی ئەوەی هەیە مانگی داهاتوو سەردانی ئیسرائیل بکات، ئەمە لە کاتێکدایە کە ئەمڕۆ سەرۆکی مۆساد بۆ ڕێککەوتنی گشتگیر لەبارەی غەززە لەگەڵ سەرۆکوەزیرانی قەتەر کۆبووەوتەوە و میدیاکان ئاشکرایان کردووە، ئەگەر ڕێککەوتن بکرێت بە ئەگەرێکی زۆرەوە ترەمپ سەردانی ئیسرائیل دەکات.

وێنە گەورەکە: نزیکەی سێ ساڵە شەڕی نێوان حەماس و ئیسرائیل بەردەوامە و ئێستا هەوڵەکان بۆ کۆتاییهێنان بەم شەڕە لەلایەن سەرۆکی ئەمریکاوە چڕتر کراوەتەوە کە بەهۆی ئەم شەڕەوە تاوەکو ئێستا بە هەزاران هاووڵاتی کەرتی غەززە گیانلەدەستداوە لە برسان مردوون.

بڵاوکراوەی فەرمی: میدیا ئیسرائیلییەکان بڵاویان کردووەتەوە، دۆناڵد ترەمپ، سەرۆکی ئەمریکا بیر لەوە دەکاتەوە کە لە مانگی داهاتوو سەردانی ئیسرائیل بکات ئەگەر ڕێککەوتنی گشتگیر لەنێوان حەماس  وئیسرائیل و گەڕانەوەی بارمەتەکان بکرێت، هاوکات ئەمریکا هەوڵی جددی دەدات بۆئەوەی ئاگربەست لە غەززە ڕابگەیێنریت و کۆتایی بەو شەڕە بهێنرێت.

ئەوەی پێویستە بیزانیت: لە سەرەتای دەستپێکردنی هێرشەکانی ئیسرائیل بۆ سەر کەرتی غەززە لە 7ـی ئۆکتۆبەری ساڵی 2023 تاوەکو ئێستا 61 هەزار و 722 کەس کوژراون و 154 هەزار و 525 کەسی دیکەش برینداربوون، هاوکات 235 کەس بەهۆی برسێتییەوە گیانیان لەدەستداوە کە 106ـیان منداڵن.