هەفتەی داهاتوو لە عێراق و هەرێمی کوردستان مانگگیران ڕوودەدات

ئاڤا نیوز

دیوانی وەقفی سوننی ئاشکرای کرد، یەکشەممەی داهاتوو مانگگیرانی تەواو لە عێراق و هەرێمی کوردستان ڕوو دەدات.

چیرۆکی سەرەکی: یەکێک لە دیاردە فەلەکییە دیارەکانی ساڵ لە ئاسمانی عێراق و زۆربەی وڵاتانی ئاسیا ڕۆژی یەکشەممە 7ی ئەیلوولی 2025 ڕوو دەدات کە مانگگیرانێکی تەواوە و بە "مانگی خوێن" ناسراوە، دیمەنێکی دەگمەنە، ئارەزوومەندانی فەلەکناسی بۆ لای خۆی ڕادەکێشێت.

ڕاگەیێنراوی فەرمی: دیوانی وەقفی سوننی لە ڕاگەیێنراوێکدا داوای لە سەرجەم مزگەوتەکانی سەر بە ئەوقاف کرد کاتژمێر 08:30 خولەکی ئێوارە بە کاتی بەغدا نوێژی مانگگیران ئەنجام بدەن.

زانیاریی زیاتر: بەگوێرەی تەلیسکۆپی عێراق، مانگگیران لە کاتژمێر 6:28 خولەکی ئێوارە بە کاتی بەغدا دەستپێدەکات و تاوەکو کاتژمێر 11:55 خولەکی شەو بەردەوام دەبێت، ئەوکاتە مانگ لە لوتکەی خۆیدا بە ڕەنگێکی سووری خوێن لە ناوەڕاستی ئاسمان دەردەکەوێت.

ئەوەی پێویستە بیزانیت: شارەزایان داوایان لە خەڵک کردووە خۆیان ئامادە بکەن بۆ بینینی ڕووداوەکە، چونکە پێشبینی دەکرێت لە زۆربەی ناوچەکانی عێراقدا مەودای بینین ڕوون بێت و مانگگیرانەکە بەشێوەیەکی ئاسایی بە چاو یان لە ڕێگەی تەلیسکۆپ ببینرێت.