ئێران و ئەمریکا چەند پەیامێک ئاڵوگۆڕ دەکەن

ئاڤا نیوز

وەزیری دەرەوەی ئێران ڕایدەگەیێنێ، لە هەفتەکانی ڕابردوودا پەیوەندییان لەگەڵ ئەمریکا هەبووە و سەبارەت بە بارودۆخی ناوچەکە چەند پەیامێکیان ئاڵوگۆڕ کردووە. لەبارەی پەرەسەندنی گرژییەکانیش هۆشداری دەدات گواستنەوەی شەڕ بۆ لوبنان دەبێتە هۆی کۆتاییهاتنی نەتانیاهۆ.

 
لێدوانی فەرمی: حوسێن ئەمیر عەبدوڵاهیان، وەزیری دەرەوەی ئێران، لە میانەی سەردانەکەیدا بۆ لوبنان و لە کۆنگرەیەکی ڕۆژنامەڤانیدا ڕایگەیاند، ئێران نایەوێت شەڕی غەززە فراوانتر بێت و بۆ ناوچەکە بگوازرێتەوە؛ ئێستا ئیسرائیل بە ناچاری بەدوای ڕێگایەکەوەیە بۆ دەرچوون لە شەڕی غەززە، هەر هەنگاوێکیش بۆ فراوانکردنی شەڕەکە بەرەو لوبنان، دەبێتە دواهەمین ڕۆژی نەتانیاهۆ. 

لەلایەکی دیکەوە: - لە ماوەی هەفتەکانی ڕابردوودا ئێران و ئەمریکا چەند پەیامێکیان ئاڵوگۆڕ کردووە، ئەمریکا داوای لە تاران کردووە داوا لە حیزبوڵڵا بکات بەشێوەیەکی فراوان و گشتگیر لە شەڕی دژ بە ئیسرائیلدا بەشداریی نەکات.