گرووپێکی جوو بەشداری لە مەراسیمی بەخاکسپاردنی هەنییە دەکەن

ئاڤا نیوز 

گرووپی "ناتۆری کارتا"ی جوو، بەشدارییان لە مەراسیمی بەخاکسپاردنی تەرمی سەرۆکی مەکتەبی سیاسیی بزووتنەوەی حەماس لە دەوحەی پایتەختی قەتەر کرد.

وێنە گەورەکە: گرووپی "ناتۆری کارتا" لە هەزاران جوو پێکهاتووە کە دژی زایۆنیزم و دەوڵەتی ئیسرائیلن، بەشێکیان بەشدارییان لە مەراسیمی بەخاکسپاردنی ئیسماعیل هەنییە، سەرۆکی مەکتەبی سیاسیی بزووتنەوەی حەماس کرد كە چوارشەممە لە تاران كوژرا.

زانیاریی بەدەستهاتوو: بە گوێرەی ڤیدیۆیەک کە لە میدیاکان بڵاوکراوەتەوە، بەشێک لە جووەکانی سەر بە گرووپی "ناتۆری کارتا" لە مەراسیمی بەخاکسپاردنی ئیسماعیل هەنییە لە دەوحە بەشداربوون.

ئەوەی پێویستە بیزانیت: گرووپەکە لە ساڵی 1935 دامەزراوە، داوا دەکات ئەو  خاکەی ئیسرائیل داگیریکردووە بۆ فەلەستینییەکان بگەڕێنرێتەوە، چونکە بەگوێرەی تەفسیرێکی ئایینییان "نابێت بە هێز ئەو خاکە کۆنترۆڵ بکرێت و پێچەوانەی ئیرادەی خوا"یە.