وتەبێژی وەزارەتی کارەبا: هاوبەشانی کارەبا ئیتر پارە بە یەک سەرچاوە دەدەن

ئاڤا نیوز

 

لەڕێگەی سیستمی پۆستپەید کارەبای 24 کاتژمێری بۆ هاونیشتمانیان و هاوبەشانی کارەبا دابین دەکرێت، گوتەبێژی وەزارەتی کارەباش دەڵێت "پارەکە بە یەک سەرچاوە دەدرێت و کەمترە لەو پارەیەی پێشتر بە کارەبای نیشتمانی و مۆلیدە دەدرا".

 

لێدوانی فەرمی: ئومێد ئەحمەد، گوتەبێژی وەزارەتی کارەبای حکومەتی هەرێمی کوردستان، بە ئاڤا نیوزی ڕاگەیاند: مانگانە پسولەی کارەبا بۆ هاونیشتمانیان و هاوبەشانی کارەبا دێتەوە، بەگوێرەی ئەو بڕە کارەبایەی بەکاریانهێناوە پارەیان لێوەردەگیرێت، پارەکەش بە یەک سەرچاوە دەدەن، نەک وەک پێشتر کە بە دوو سەرچاوە دەدرا.

 

گوتەبێژی وەزارەتی کارەبا دەڵێت: کارەبای 24 کاتژمێری بە سیستمی پۆستپەید دەبێت، واتە پاشەکی پارەیان لێ وەردەگیرێت، نەک وەک پریپەید کە کارت دەکڕن و دواتر داخلی دەکەن.

 

ئەوەی پێویستە بیزانیت: بەکارهێنانی کارەبای 24 کاتژمێری و ئەم سیستمە نوێیە کاریگەری ئەرێنی لەسەر پاک ڕاگرتنی ژینگە و دوورکەوتنەوە لە ژاوەژاوی مۆلیدەکان دەبێت.