سوودانی هۆشداری بە گرووپە چەکدارەکانی عێراق دەدات

ئاڤا نیوز

 

سەرۆکوەزیرانی عێراق ئاشکرایکرد، بڕیاری شەڕ و ئاشتی لەلایەن دامەزراوە دەستوورییەکانیی دەوڵەتی عێراقەوە دەدرێت و بەرژەوەندی عێراقییەکانیش لە سەرووی هەموو شتێکەوەیە.

 

وێنە گەورەکە: وێڕای ئەوەی حکومەت و مەرجەعی باڵای شیعەکان و زۆربەی لایەنە سیاسییەکانی عێراق نایانەوێت عێراق ببێتە بەشێک لە شەڕ و ململانێی ناوچەکە، لەبەرامبەردا بەشێک لە گرووپە چەکدارەکانی عێراق پابەندی بڕیاری ڕاگرتنی گرژییەکان نابن و دەیانەوێت عێراق پەڵکێشی جەنگێکی ماڵ وێرانی بکەن.

 

ڕاگه‌یێنراوی فه‌رمی: نووسینگەی ڕاگەیاندنی سەرۆکوەزیرانی عێراق بڵاوی کردەوە: لە دیدارێکدا لەگەڵ سەرۆک هۆز و خێڵەکانی پارێزگای واست، سوودانی جەختی لەسەر ڕژدبوونی حکومەتەکەی کردەوە سەبارەت بە پاراستنی بەرژەوەندییەکانی عێراق و خەڵکەکەی.

   

زانیاریی زیاتر: بەگوێرەی راگەیێندراوەکە، سوودانی ئاماژەی بەوەش کردووە، هەر کەس و لایەنێک لە ئاراستەکانی حکومەت لابدات، ڕووبەڕووی دەوڵەت دەبێتەوە، کە بۆ جێبەجێکردنی بڕیار و ئەرکەکانی پشت بەهێزی دەستوور و یاسا دەبەستێت.