لە شارەزوور زیاتر لە 500 کەس تووشی سکچوون و ڕشانەوە دەبن

ئاڤا نیوز 

زیاتر لە 500 کەس لە شارەزوور تووشی سکچوون و ڕشانەوە بوون، بەڕێوبەرایەتیی تەندروستی سلێمانیش لیژنەیەک بۆ دەستنیشانکردنی هۆکارەکە پێکدەهێنێت.

وێنە گەورەکە: ماوەی دوو ڕۆژە زیاتر 500 کەس لە شارەزوور تووشی سکچوون و ڕشانەوە بوون، لەو ژمارەیە تەنیا لە ماوەی هەشت کاتژمێردا نزیکەی 200 نەخۆش لە نەخۆشخانەی گشتیی شەهید ڕەئوف بەگ تۆمار کراون.

لێدوانی فەرمی: کەمال تاوەگۆزی لە نەخۆشخانەی شەهید ڕەئوف بەگ لە قەزای شارەزوور بە ئاڤا میدیای ڕاگەیاند: بەپێی ئەو پشکنینانەی لەناو نەخۆشخانەکەدا کراون، گومان دەکرێت هۆکارەکەی ئاوی خواردنەوە بێت و زۆربەی نەخۆشەکانیش منداڵن.

لەلایەکی دیکەوە: د. سەرکار سوورچی، وتەبێژی وەزارەتی تەندروستی ئەوەی بۆ ئاڤا نیوز ئاشکرا کرد، تووشبووەکان چارسەری پێویستیان وەرگرتووە و ڕەوانەی ماڵەوە کراونەتەوە، هاوکات لیژنەیەکی تایبەتمەند لەلایەن بەڕێوبەرایەتیی تەندروستی سلێمانی بۆ هۆکاری سەرەکیی پێکهێنراوە، تاوەکو پشکنین بۆ ئاوی شارەزوور بکرێت و دواتر ئەنجامی لێکۆڵینەوەکان ڕادەگەیێنین.