بەشێک لە مووچەخۆران ئەم مانگە دوو مووچە بەیەکەوە وەردەگرن

ئاڤا نیوز

کێشەی مووچەی هەزاران خانەنشین چارەسەر دەکرێت و ئەم مانگە دوو مووچە بەیەکەوە وەردەگرن، لە سنووری هەولێریش بەهۆی خۆتۆمارنەکردنیان لە بایۆمەتری مووچەی دوو هەزار خانەنیشن ڕاگیراوە.

وێنە گەورەکە: بەشێک لە خانەنشینان و کەسوکاری شەهیدان و خاوەن پێداویستییە تایبەتەکان، بەهۆی گرفتی ژمارەی کەسی بێ هاوتا (یو پی ئێن) مووچەی مانگی10یان ڕاگیرابوو، بە ئەنجامدانی پرۆسەی بایۆمەتری کێشەکەیان چارەسەر بووە و ئەم مانگە دوو مووچە بەیەکەوە وەردەگرن. 

لێدوانی فەرمی: ژیار ئەکرەم، سەرپەرشتیاری بنكەكانی تۆماری بایۆمەتریی هەولێر بە ئاڤا میدیای ڕاگەیاند: بەشێکی زۆریان مانگی ڕابردوو (یو پی ئێن)یان کردووە و ئێستا هیچ کێشەیەکیان نەماوە و ئەم مانگە مووچەی مانگی 11 بێ کێشە وەردەگرن، مووچەی مانگی 10ـشیان بۆ قەرەبوو دەکرێتەوە و هەردووکی بەیەکەوە وەردەگرن.

ئەوەی پێویستە بیزانیت: ئێستا  99.9%ی مووچەخۆرانی هەرێمی کوردستان کێشەی بایۆمەترییان نییە و بەبێ گرفت مووچە وەردەگرن.