زیاتر لە 35 هەزار فەرمانبەری هەرێمی کوردستان خانەنشین دەکرێن

ئاڤا نیوز

قەرەباڵغییەکی زۆر لە فەرمانگەکانی شارەکاندا دروستبووە، ژمارەیەکی زۆری فەرمانبەر خانەنشین دەبن و بەشێوەیەکی کتوپڕ ئەرکەکانیان جێدەهێڵن، بەگوێرەی ڕێنمایی وەزارەتی دارایی، 23 ڕۆژە ئەو کەسانە خانەشینی دەیانگرێتەوە و زیاد دەوامیان  کردووە، چونکە لە 01-01-2025ـەوە وەک خانەنشین هەژمار دەکرێن.

 

ئەوەی ئێستا ڕوودەدات: حکومەتی عێراق داوای لە هەرێمی کوردستان کردووە تەمەنی خانەنشینی هاوتا بکەن، بەمەش ئەم مانگە هەزاران فەرمانبەر بەیەکەوە خانەنشین دەکرێن، دەبێت ئەمڕۆ لە فەرمانگەکانیان بە نووسراوی فەرمی دەست لەکارهەڵگرتن بکەن.

 

زانیاریی بەدەستهاتوو: بەگشتی بۆ فەرمانبەرانی ئاسایی سێ تەمەن دەگرێتەوە، 60 و 61 و 62 ساڵ، بەڵام بۆ هەندێکی دیکە شەش بۆ حەوت تەمەن دەگرێتەوە، بۆنموونە پرۆفیسۆر و مامۆستایانی زانکۆ و یاریدەدەرەکانیان.

لێدوانی فەرمی: سەرچاوەیەک لە بەڕێوەبەرایەتیی گشتیی خانەنشینی سلێمانی بە ئاڤای گوت، "تاوەکو درەنگانی شەو لە ئەرکدا دەمێنینەوە، بۆ ئەوەی مامەڵەی زۆرترین خانەنشین ڕایی بکەین و لەنێو لیستی مووچەی مانگی دوو وەک خانەنشین تۆماربکرێن و بەهاوتاکراوی مووچەکانیان وەربگرن."

 

زانیاریی زیاتر: ئەوانەی خانەنشین دەکرێن لە مانگی یەکەوە مووچەی خانەنشینی وەردەگرن و ئەو فەرمانبەرانەشی وارسی شەهیدی پلە یەک و پلە دوو بێت، دەبێت نووسراوێک لە دەزگای شەهیدان بێنێت و ئاراستەی بەڕێوەبەرایەتی گشتیی خانەنشنین بکرێت بۆ ئەوەی خزمەت و ئیمتیازاتەکانیان بۆ ببەسترێت.