ئەو مووچەخۆرانەی لە 15 ساڵ كەمتر خزمەتیان هەیە لە مووچەی خانەنشینی بێبەش دەبن

ئاڤا نیوز

بەڕێوەبەری گشتیی خانەنشین سەبارەت بەو مووچەخۆرانەی كە تەمەنی خانەنشینییان هاتووە و كەمتر لە 15 ساڵ خزمەتیان هەیە ڕوونكردنەوە دەدات.

وێنە گەورەكە: ڕۆژی چوارشەممە، 2025-01-15، سەرۆكوەزیران مەسرور بارزانی، بە نووسراوی ژمارە 191، بڕیاری كەمكردنەوەی تەمەنی خانەنشینی لە 63 ساڵەوە بۆ 60 ساڵ دا، هاوكات ماوەی خزمەتی  لە 15 ساڵەوە بەرز كردەوە بۆ 25 ساڵ بۆ كەسێک كە ئارەزوومەندانە داواكاری خانەنشینی پیشكەش بكات.

لێدوانی فەرمی: مریەم عوسمان، بەڕێوەبەری گشتیی خانەنشینی هەرێمی كوردستان بە ئاڤا میدیای ڕاگەیاند: بەشێك لە مووچەخۆران لە هەرێمی كوردستان تەمەنیان گەیشتووەتە 60 ساڵ دەبێت خانەنشین بكرێن و خزمەتیان كەمترە لە 15 ساڵ، بەڵام بەپێی ئەو یاسایەی لە عێراق هەیە،  لە مووچەی خانەنشینی بێبەش دەبن واتا خانەنشین ناكرێن و تەنیا پاداشتی خانەنشینییان پێدەدرێت و كۆتایی بە ڕاژەیان دەهێنرێت، ئەمەش بۆ عێراق و هەرێمی كوردستان هەمان ڕێككارە.

ئەوەی پێویستە بیزانیت: هەر فەرمانبەرێک کە خانەنشین دەبێت تەمەنی خانەنشینییەكەی لە 25 ساڵ كەمتر نەبێت، 6 مووچە لە فەرمانگەکەی خۆی وەردەگرێت، 12 مووچەی تر بەڕێوەبەرایەتی خانەنشین پێیدەدات، بەو مەرجەی 180 ڕۆژ مۆڵەتی کۆکراوەی هەبێت لە کۆی خزمەتەکەی کە 25 ساڵە، بەڵام ئەو فەرمانبەرانەی خزمەتیان کەمترە لە 25 ساڵ، تەنیا شەش مووچەی بنەڕەتی لە فەرمانگەکەیان وەردەگرن و لەو 12 مووچەیەی لە خانەنشینی خەرجدەکرێت سوودمەندنابن.