شاندێکی ئیسرائیل سەردانی دەوحە دەکات

ئاڤا نیوز

 

دوای کۆتایی هاتنی گەڕی شەشەمی ئاڵوگۆڕی بەرمتە و زیندانیکراوان لە نێوان ئیسرائیل و حەماس، بڕیارە شاندێکی ئیسرائیل لەسەر پرسی دەستپێکردن بە قۆناغی دووەمی ئاگربەستی غەززە سەردانی دەوحە بکات. 

 

ڕاگەیێنراوی فەرمی: ئۆفیسی بنیامین نەتەنیاهۆ، سەرۆکوەزیرانی ئیسرائیل ڕایگەیاند، لەسەر داوای سەرۆکوەزیرانی ئیسرائیل و بەهەماهەنگی لەگەڵ نوێنەری دۆناڵد ترەمپ، سەرۆکی ئەمریکا، بڕیارە سبەی شاندێکی ئیسرائیل سەردانی دوحە بکات و دەسەڵاتی ئەوە بە شاندەکە دراوە تاوتوێی قۆناغی یەکەمی ئاگربەستی غەززەش بکەن.

 

چاوەڕوانکراوەکان: چاوەڕێ دەکرێت دوای کۆبوونەوەی شاندەکە لەگەڵ بەرپرسانی قەتەر، ڕێنمای دەستپێکردنی قۆناغی دووەمی ئاگربەست ڕابگەیەنرێت.

 

گۆشەیەکی دیکەی دیمەنەکە: هەر سبەی سێ شەممە، بڕیارە کابینەی حکومەتەکەی نەتەنیاهۆ، لەسەر پرسی ئازادکردنی زیندانیکراوانی فەلەستین لە قۆناغی دووەمدا کۆبوونەوەی خۆی بکات.

 

قووڵتر: بڕیاربوو دوای 16 ڕۆژ چوونە بواری جێبەجێکردنی قۆناغی یەکەم، قۆناغی دووەمی ئاگربەستیش دەستپێبکات، بەڵام ئیسرائیل ناردنی شاندەکەی بۆ دەوحە دواخست.