ئیدارەی سۆران پشووی لە ناوەندەکانی خوێندن ڕاگەیاند

ئاڤا نیوز

بەهۆی نالەباری کەشوهەوا و ئەگەری دروستبوونی شەختە بەتایبەت لە بەشێکی سنووری ئیدارەی سەربەخۆی سۆران، سبەی لە ناوەندەکانی خوێندن لەو سنوورە کرایە پشوو.

چیرۆکی سەرەکی: ماوەی چەند ڕۆژێکە شەپۆلێکی سەرما و سۆڵە ناوچەکانی هەرێمی کوردستانی گرتۆتەوە و لە هەندێک ناوچە پلەکانی گەرما بۆ ژێر سفر دابەزیون و بەفر و بارانی چڕ دەبارێت.

لێدوانی فەرمی: بەڕێوەبەری گشتیی پەروەردەی سۆران بە ئاڤا میدیای ڕاگەیاند : دوای ڕاوێژ لەگەڵ ئیدارەی سەربەخۆی سۆران بۆ سەلامەتی گیانی پەروەردەکاران و قوتابیانی ئازیز، بەهۆی نالەباری کەشوهەوا و ئەگەری دروستبوونی شەختە بەتایبەت لە بەشێکی سنوورەکەمان، بڕیارمان دا بە پشووی فەرمی لە سەرجەم قوتابخانەکانی حکومی و ناحکومی و پەیمانگەکانی سنووری بەڕێوەبەرایەتییەکەمان بۆ سبەی دووشەممە.

تاقیکردنەوەکانی بەرایی - تمهیدی پۆلی 12 لەکاتی خۆی و بێ دواخستن دەکرێن و پشووەکە ئەوان ناگرێتەوە.