ماکرۆن: نابێت ئەوروپا ببێتە پاشکۆی ئەمریکا

ئاڤا نیوز

ئیمانوێل ماکرۆن، سەرۆکی فەرەنسا، داوای کرد، وڵاتانی ئەوروپا خۆیان نەکەنە پاشکۆی سیاسەتەکانی ئەمریکا و خۆیان ڕادەست نەکەن.

ئەوەی پێویستە بیزانیت: سەرەڕای کۆبوونەوە و پێشوازیی گەرمی دۆناڵد ترەمپ لە ماکرۆن لە کۆشکی سپی، بەڵام ماکرۆن لە سیاسەتەکانی ئیدارەی ترەمپ بەرامبەر بە ئەوروپا نیگەرانە.

لێدوانی فەرمی: لە میانەی سەردانێکیدا بۆ پورتوگال، ماکرۆن ڕایگەیاند: ئێستا ئەمریکا گۆڕانکاریی گەورە بەخۆوە دەبینێت، بەڵام لەگەڵ ئەوەشدا پێویستە پەیوەندییەکان بپارێزین، چونکە پێویستیمان بە بۆشایی زیاتر نییە، لەهەمان کاتیشدا دەبێت ئەوە بزانین کە قۆناغێکی ناسەقامگیری و نادڵنیایی دەستپێدەکەین.

ئەوەی لەوبارەیەوە دەگوترێت: ماکرۆن لە بڕیارەکانی ترەمپ نیگەرانە و دەڵێت بوونەتە هۆی ناسەقامگیریی جیوپۆلەتیکی و ئابووری. ئەمەش لە دوای ئەوەی کە ترەمپ هەڕەشەی سەپاندنی گومرکی زیاتر بە سەر ئەوروپادا دەکات.

ئەمەش بزانە: فەرەنسا و وڵاتانی دیکەی ئەوروپا لە شێوازی مامەڵەی ئەمریکا لە بەرامبەر شەڕی ئۆکراینا نیگەرانن و لەو باوەڕەدان پێویستە ئاسایشی ئۆکراینا گەرەنتی بکرێت.