لیژنەی وزەی پەرلەمان: بۆ دەستپێکردنەوەی هەناردەی نەوت بەغدا چاوەڕێی وەڵامی ئەنقەرەیە

 

 

ئاڤا نیوز

بە گوتەی ئەندامێکی ئەنجوومەنی نوێنەرانی عێراق، سەرجەم ڕێوشوێنەکان بۆ هەناردەکردنەوەی نەوتی کوردستان ئامادەن، بەڵام بەغدا چاوەڕوانی دوایین وەڵامی ئەنقەرەیە.

وێنە گەورەکە: سەبارەت بە هەناردەکردنەوەی نەوتی هەرێمی کوردستان، هەردوو وەزارەتی سامانە سروشتییەکانی هەرێمی کوردستان و وەزارەتی نەوتی عێراق ڕێککەوتوون، چاوەڕێی وەڵامی تورکیان.

لێدوانی فەرمی: سەباح سوبحی ئەندامی لیژنەی نەوت و گاز لە ئەنجوومەنی نوێنەرانی عێراق ئاشکرای دەکات، وەزارەتی نەوت لیژنەیەکی تایبەتمەندی بۆ دڵنیابوونی بۆری نەوت لە خورمەڵەوە تاوەکو سنووری تورکیا ڕەوانەی زاخۆ کردووە. سەرجەم ڕێوشوێنەکانیش بۆ هەناردەکردنەوەی نەوت ئامادەن، بەڵام بەغدا چاوەڕوانی دوایین وەڵامی ئەنقەرەیە.

دەشڵێت، تاوەکو ئێستا دیدگا ڕوون نییە بە تایبەت دوای ئەوەی بە گوێرەی بڕیاری دادگای پاریس تورکیا پابەند کرا ملیارێک و 400 ملیۆن دۆلار بە عێراق بدات، چونکە پێشێلی بڕیاری هێڵی بۆری گواستنەوەی کردووە کە لە ساڵی 1973ـەوە واژۆکراوە. بۆیە دیار نییە کە تورکیا پابەند دەبێت ئەو بڕە پارەیە بە عێراق دەداتەوە یان نا.

زانیاریی زیاتر: دانوستاندن لە نێوان هەردوو وڵات لە بارەی قەرز و شایستەی کۆمپانیاکان بەردەوامە، بە تایبەت دوای ئەوەی لە یاسای بودجەدا سەرجەم دۆسیە هەڵپەسێردراوەکانی نێوان هەولێر و بەغدا چارەسەرکراون، بۆیە ئێستا هەناردەکردنەوەی پێویستی بە تێپەڕاندنی یاسای نەوت و گاز هەیە تاوەکو ئەو کێشەیە بە تەواوی ڕیشەکێش بکرێت.