بەرپرسانی عێراق: هیچ جێگرەوەیەکی بەپەلەمان بۆ غازی ئێران نییە

ئاڤا نیوز

 

بڕیارەکەی ئەمریکا بۆ هەڵوەشاندنەوەی مۆڵەتی ڕێگەپێدان بە عێراق تا غاز لە ئێرانەوە هاوردە بکات، بەغدا ڕووبەڕووی قەیرانی کارەبا لە هاویندا دەکاتەوە و بەرپرسانی عێراقیش دەڵێن، هیچ جێگرەوەیەکی بەپەلەیان بۆ غازی ئێران نییە.

 

ئەوەی پێویستە بیزانیت: لە 8ی ئەم مانگەوە حکومەتی ئەمریکا ئەو مۆڵەتەی هەڵوەشاندەوە کە ڕێگەی بە عێراق دەدا غازی ئێران بۆ دابینکردنی کارەبا هاوردە بکات، بڕیارەکەی ئیدارەی ترەمپ لە چوارچێوەی ئەوپەڕی فشاری ئابووری دایە کە بەسەر تاراندا سەپاندویەتی.

 

زانیاریی بەدەستهاتوو: بەرپرسێکی وەزارەتی کارەبای عێراق بە ئاژانسی ڕۆیتەرزی ڕاگەیاندووە، حکومەت ڕێکاری بەپەلەی گرتووەتەبەر تا کاریگەرییەکانی بڕیارەکەی ئەمریکا لەسەر کەرتی کارەبای عێراق کەمبکاتەوە.

 

- هاوکات بە وتەی سێ بەرپرسی دیکەی کەرتی وزەی عێراق، بەغدا لەم کاتەدا هیچ جێگرەوەیەکی بەپەلەی بۆ غازی ئێران نییە و ئەوەش کێشەیەکی گەورە بۆ دابینکردنی کارەبای نیشتیمانی لە هاویندا دروستدەکات، لیژنەی نەوت و غازی پەرلەمانی عێراقیش جەختیکردووەتەوە کە عێراق بەرەو هاوردەکردنی غاز لە وڵاتانی کەنداوەوە هەنگاو دەنێت.