فایلی خەڵک؛ لە دووکان دانیشتووانی چەند گوندێک داوای دروستکردنی پردی پەڕینەوە دەکەن

ئاڤا نیوز

دانیشتوانی چەند گوندێکی بناری چیای ئاسۆس لە دووکان داوای دروستکردنی پردێکی پەڕینەوە لە زێی بچووک دەکەن، بەڵام لەبەر نەبوونی پارەی نەختینە ناتوانرێت بۆیان دروست بکرێت.

چیرۆکی سەرەکی: دانیشتوانی گوندی لبانە و 13 گوندی دیکە لە قەزای دووکان داواکارن پردێکیان بۆ درووست بکرێ لەسەر زێێ بچووک، چونکە خەڵکەکە هێشتا بە کەڵەک دەپەڕنەوە، گەشتیاریش کە سەردانیان دەکەن هەر بەسەر ئەو کەڵەکە دەپەڕنەوە.

لێدوانی فەرمی: ئومێد حمەد ئەحمەد، بەڕێوبەری ئاوەدانکردنەوە و چاکردنەوەی ڕێگاوبانی ڕاپەڕین  بە ئاڤا میدیای ڕاگەیاند:

٠ لە دوو شوێن بڕیاری دروستکردنی پرد دراوە بەبڕی زیاتر لە 100 ملیۆن دینار، بەڵام لەبەر نەبوونی پارەی نەختینە نەتوانراوە دەست بکەن بە دروستکردنیان.

٠ چاوەڕوان دەکرێت پرۆژەی پردێکی ستراتیژی بدرێت بە کۆمپانیایەک دیزاینی بکێشێت، شوێنێکی گونجاوی بۆ دەستنیشان دەکەن و لەداهاتوودا پارەی بۆ تەرخان بکرێت و دروستی بکەن.