سوپای پاکستان: هەر ئێستا  وەڵامی هێرشەکانی هیندستان دەدەینەوە

ئاڤا نیوز

سوپای هیندستان ئەمشەو چەند هێرشێکی ئاسمانی کردە سەر هەرێمی کشمیری پاکستان و چەند پێگەیەکی کردە ئامانج.

وێنە گەورەکە: ڕۆژی سێشەممە 22-4-2025، گروپێکی چەکداری هێرشیان کردە سەر هەرێمی کشمیر لە خاکی هیندستان، لێکەوتەکانی ئەم هێرشە هەردوو وڵاتی خاوەن چەکی ئەتۆمی هیندستان و پاکستان بەرەو لێواری جەنگێکی وێرانکەر دەبات ئەمشەو سوپای هیندستان بە بیانووی هێرشکردنە سەر پیگەی تیرۆریستان، هێرشی ئاسمانی  بۆ سەر خاکی پاکستان ئەنجامدا و سەروەری وڵاتەکەی بەزاند.

بڵاوکراوەی فەرمی: سوپای هیندستان کەمێک پێش ئێستا لە بڵاوکراوەیەکی فەرمیدا ڕایگەیاند، لەم هێرشانەدا بنکە و پێگەی "تیرۆریستان"ی بە ئامانج گرتووە و هیچ پێگەیەکی سوپای پاکستانی نەکردووەتە ئامانج و نایەوێت جەنگ ڕووبدات.

لێدوانی فەرمی: خەواجە عاسف، وەزیری بەرگری پاکستان ڕایگەیاند، هیندستان هێرشی ئاسمانی کردووەتە سەر خاکی پاکستان و سەروەری وڵاتی بەزاندووە.

لە لایەکی دیکەوە: سوپای پاکستان هەر ئێستا لە بڵاوکراوەیەکی فەرمیداڕایگەیاند: لە هێرشەکەی هیندستان لانی کەم سێ کەس کوژراون و 12 کەس بریندار بوون. ئامادەین بۆ وەڵامدانەوەی هێرشەکانی هیندستان و "چاوەڕوانی فەرمانین".