نزیکەی هەزار حەجخوازی دیکە لە هەولێرەوە بەرەو سعوودیە بەڕێ دەکەون

ئاڤا نیوز

دوای ئەوەی ئەمڕۆ هەینی 761 حەجخوازی سنووری پارێزگای سلێمانی بەرەو سعوودیە بەڕێ کەوتن و ئەمشەو دەگەنە کەربەلا. بڕیارە سبەی کاتژمێر حەوتی بەیانی نزیکەی هەزار حەجخوازی دیکە لە سنووری پارێزگای هەولێر بەڕێ بکەون.

وێنە گەورەکە: ئەمساڵ لەسەر ڕاسپاردەی مەسرور بارزانی، سەرۆک وەزیرانی کوردستان، حکومەت چوار ملیار و 200 ملیۆن دیناری بۆ پاڵپشتی حەجخوازان تەرخانکردووە. ئەمەش لەپێناو ئەوەی تێچووی حەج لەسەر هاونیشتمانیان کەمبێتەوە.

لێدوانی فەرمی: کاروان ستوونی، وتەبێژی بەڕێوەبەرایەتی حەج و عومرەی کوردستان بە ئاڤا میدیای وت، بۆ هەموو پڕۆسەیەکی بەڕێکردنی حەجخوازان مەراسیمی تایبەت ڕێکدەخرێت. ڕۆژی شەممە 951 حەجخوازی دیکەی هەولێر، دهۆک، ئیدارەی سەربەخۆی زاخۆ و سۆران بەڕێ دەکەون و لەگەڵ هەموو کاروانەکان تیمی کارگێڕی و تەندروستیی یاوەریان دەبێت.

باکگراوند: ئەمساڵ لە هەرێمی کوردستانەوە، پێنج هەزار و 136 کەس گەشتی حەج دەکەن، لەو ژمارەیە هەزار و 440 کەسیان بەڕێگای وشکانی گەشت دەکەن.