چوارچێوەی هەماهەنگی لەبارەی هەڵبژاردن لە بڕیارێکی پاشگەزدەبێتەوە

ئاڤا نیوز

هەرچەندە ڕۆژی دووشەممە چوارچێوەی هەماهەنگیی شیعەکان ئاشکرای کرد لە سێ پارێزگای عێراق بە یەک لیست بەشداریی لە هەڵبژاردن دەکات، بەڵام دوێنێ لەو بڕیارەی پاشگەزبووەوە و ڕایگەیاند، لە هەموو عێراق بە لیستی جیاواز بەشداریی لە هەڵبژاردنی پەرلەمان دەکەن.

ئەوەی پێویستە بیزانیت: چوارچێوەی هەماهەنگی لە لانیکەم 10 لایەنی سیاسی شیعە پێکدێت و پێکهێنەر و پاڵپشتی سەرەکی حکومەتی عێراقن، بۆ هەڵبژاردنی داهاتووش بە زیاتر لە شەش لیست بەشداریی هەڵبژاردن دەکەن، بەڵام ڕۆژی دووشەممە ڕایانگەیاند کە لە دیالە، سەڵاحەددین و نەینەوا سەرجەمیان بە یەک لیست دادەبەزن.

ڕاگەیێنراوی فەرمی: بڕیارەکەی چوارچێوەی هەماهەنگی زۆری نەخایاند و دوای کەمتر لە 24 کاتژمێر ڕوونکردنەوەیەکیان بڵاوکردەوە، تیایدا دەڵێن، پابەندی بڕیاری کۆبوونەوەی 21ی نیسان دەبن و چوارچێوەی هەماهەنگی لە هەموو وڵاتدا بە فرەلیستی بەشداریی لە هەڵبژاردنی پەرلەمانی عێراق دەکات کە بڕیارە 11-11- 2025 بەڕێوەبچێت.