لە عێراق سێ کەس بەتۆمەتی دزینی مۆلیدەی مزگەوت دەستگیر دەکرێن

ئاڤا نیوز

دەستەی دەستپاکی عێراق دەستگیرکردنی سێ کەسی بەتۆمەتی دزینی مۆلیدەی مزگەوت لە ئەنبار ڕاگەیاند، کەسێکی دیکەش بەتۆمەتی دزینی گۆڕەڕ (محاویلە)ی کارەبایی لە هەمان پارێزگا دەستگیرکراوە.

وێنە گەورەکە: بەدواداچوون بۆ حاڵەتەکانی پێشێلکردنی یاسا و بەهەدەردانی سامانی گشتی، ئەرکی دەستەی دەستپاکییە و ساڵانەش دەستەکە دەیان ملیار دینار بۆ خەزێنەی دەوڵەت دەگەڕێنێتەوە.

ڕاگەیێنراوی فەرمی: دەستەی دەستپاکی عێراق لە ڕاگەیێنراوێکدا ئاماژەی بەوەکردووە، نووسینگەی لێکۆڵینەوەی ئەنبار سێ کەسی لەکاتی دەستبەسەرداگرتنی مۆلیدەیەکی کارەبا لە مزگەوتی (دەوڵەتی گەورە) لە شاری ڕوومادی دەستگیرکردووە کە سەرقاڵی گۆڕینی مۆلیدەکە بوون بە مۆلیدەیەکی بچوکتر بەپاساوی نۆژەنکردنەوەی، دواتریش مۆلیدە سەرەکییەکە لە شوێنی خۆی دانراوەتەوە.

لەلایەکی دیکەوە: هەر لە ئەنبار کارمەندێکی دابەشکردنی کارەبا دەستگیرکراوە کە هەستاوە بە دزینی سێ گۆڕەڕ (محاویلە) و نۆ ستوونی کارەبا و لە ماڵەکەی خۆیدا شاردوونیەتەوە، تۆمەتبارەکانیش بەپێی یاسای سزادانی عێراقی ڕاگیراون و دەستەی دەستپاکی دەڵێت، سزاش دەدرێن.