وەزیری بەرگریی تورکیا: بە هەستیارییەوە کار بۆ پڕۆسەی ئاشتی دەکەین

ئاڤا نیوز

یەشار گولەر، وەزیری بەرگریی تورکیا سەبارەت بە پڕۆسەی ئاشتی و چەکدانانی پەکەکە دەڵێت: لە هەموو دەرفەتێکدا جەخت لەوە دەکەینەوە کە " پەکەکە بێ ئەوەی کات لەدەست بدات، چەکەکانی ڕادەست بکات".

چیرۆکی سەرەکی: گولەر بە بۆنەی جەژنی قوربان لەگەڵ فەرماندەی هێزە سەربازییەکانی تورکیا کۆبووەوە و جەختی لەوە کردووە کە لایەنە پەیوەندیدارەکان بە هاوبەشی کار بۆ بە ئەنجام گەیاندنی پڕۆسەکە دەکەن و بە هەستیارییەوە بەردەوامی بە کارەکانیان دەدەن.

پەیامی فەرمی: وەزیری بەرگری تورکیا لە پەیامێکدا وتی،"پێویستە پەکەکە بە زووترین کات بێ ئەوەی لەوە زیاتر کات بە فیڕۆ بدات، بڕیاری هەڵوەشاندنەوەکەی جێبەجێ بکات، ئەمەش لە پێناو بەدیهێنانی "تورکیایەکی بێ تیرۆر".

لەلایەکی دیکەوە: وەزارەتی بەرگریی تورکیا ڕایگەیاند کە لە ماوەی هەفتەیەکدا چوار چەکداری پەکەکە لە سنووری هەرێمی کوردستان، خۆیان ڕادەستی هێزەکانی تورکیا کردووە، بەڵام پەکەکە هەواڵەکەی پشت ڕاست نەکردووەتەوە.