دوای سێ ڕۆژ مانەوەیان لە دەریادا 54 کۆچبەر ڕزگاردەکرێن

ئاڤا نیوز

لە دەریای ناوەڕاست 54 کۆچبەر ڕزگارکران کە سێ ڕۆژ لەسەر سەکۆیەکی بەرهەمهێنانی نەوتی لەکارکەوتوو لەناو دەریای ناوەڕاست مابوونەوە. نەتەوەیەکگرتووەکانیش دەڵێت، بە هەزاران کۆچبەر لەو ڕێگایەوە گەیشتوونەتە ئەوروپا.

ڕاگەیێنراوی فەرمی: ڕێکخراوی مرۆیی ئۆپن ئارمزی ئیسپانی ڕایگەیاند، دوای سێ ڕۆژ مانەوەیان لەسەر سەکۆیەکی بەرهەمهێنانی نەوتی لەکارکەوتوو لە دەریای ناوەڕاست 54 کۆچبەر ڕزگارکران و لەو ماوەیەشدا منداڵێک بە سەلامەتی لەدایکبووە.

- ئەمە یەکەمجار نییە کە کۆچبەران پەنا دەبەنە بەر سەکۆی نەوتییە لەکارکەوتووەکان لەکاتێکدا هەوڵدەدەن بە بەلەمی بچووک و کۆن لە دەریای ناوەڕاست بپەڕنەوە و بگەنە کەناراوەکانی ئەوروپا.

ئەوەی پێویستە بیزانیت: بەپێی ئاماری کۆمیساری باڵای پەنابەرانی نەتەوە یەکگرتووەکان، لە سەرەتای ساڵەوە تا سەرەتای مانگی شەش، نزیکەی 23 هەزار کۆچبەر لە ڕێگەی دەریاوە گەیشتوونەتە ئیتاڵیا.