دەزگای هەواڵگریی عێراق لە هەڵەبجە دەكرێتەوە

ئاڤا نیوز

دەزگای هەواڵگریی عێراق داوای لە پارێزگاری هەڵەبجە كردووە، بەڕێوەبەرایەتییەكی سەر بە دەزگاكە لە پارێزگای هەڵەبجە بكرێتەوە.

چیرۆكی سەرەكی: ئەمڕۆ سێشەممە 24ـی حوزەیران، نوخشە ناسیح، پارێزگاری هەڵەبجە، پێشوازی لە عەمید نەریمان حەسەن، بەرپرسی دەزگای هەواڵگریی عێراق/ نووسینگەی سلێمانی و شاندی یاوەری كرد و كۆبوونەوەیەكیان ئەنجامدا.

ڕاگەیێنراوی فەرمی: بەگوێرەی ڕاگەیێنراوی دیوانی پارێزگای هەڵەبجە لەو دیدارەدا، گفتوگۆ لەبارەی كردنەوەی بەڕێوەبەرایەتیی دەزگای هەواڵگریی عێراق لە پارێزگای هەڵەبجە كراوە، هاوشێوەی سەرجەم پارێزگاكانی دیكە.

ئەوەی پێویستە بیزانیت: دوای بوونی بە نۆزدەهەمین پارێزگای عێراق، بەشێك لە دامودەزگا فیدراڵییەكان لەچوارچێوەی ڕێكارە كارگێڕییەكان نووسینگە و بەڕێوەبەرایەتیی خۆیان لەو پارێزگایە دەكەنەوە، بەهەماهەنگی لەگەڵ دامەزراوەكانی حكومەتی هەرێمی كوردستان.

لەلایەكی دیكەوە: نوخشە ناسیح، پاڵپشتی و پشتیوانیی بۆ كردنەوەی دەزگاكە دەربڕی و باسی لەوە كرد لەزووترین كاتدا ڕێكارە پێویست و ئیدارییەكان بۆ ئەم مەبەستە ئەنجام بدرێت.