70 بارهەڵگری سەربازی هاوپەیمانان لە عێراق و هەرێمی کوردستانەوە بەرەو ڕۆژئاوای کوردستان گواسترانەوە

ئاڤا نیوز

ڕوانگەی سووری بۆ مافەکانی مرۆڤ ڕایگەیاند، لەم چەند ڕۆژە 70 بارهەڵگری هاوپەیمانی نێودەوڵەتیی بۆ شەڕی داعش، بە چاودێری چڕ و ڕێوشوێنی ئەمنی تووند بەرەو بنکەی سەربازی خەرابە جیری هاوپەیمانی نێودەوڵەتیی لە حەسەکە و بنکەیەکی دیکە گواستراونەتەوە.

وێنە گەورەکە: دوای سەرهەڵدانی شەڕی داعش لە ساڵی 2014، بنکەی هاوپەیمانان بۆ شەڕی داعش لە ڕۆژئاوای کوردستان کرایەوە، ئەرکی ئەم بنکانە ڕاهێنان بووە بە هێزەکانی سووریای دیموکرات و شەڕی چەکدارانی داعش لەو ناوچەیە.

زانیاری بەدەستهاتوو: ڕوانگەی سووری بۆ مافەکانی مرۆڤ بڵاویکردوەتەوە، ئەمڕۆ بەیانی 20 بارهەڵگری سەربازی لە سنووری هەرێمی کوردستانەوە بەرەو بنکەی قەسرەک لە باکووری حەسەکە گواستراونەتەوە. لە ڕۆژانی ڕابردووش چەندین بارهەڵگری تر لە دەروازەی وەلیدی سنووری ئەنبار هاتوون و بەرەو بنکەی خەرابە جیر گواستراونەتەوە. بارهەڵگرەکان کەرەستەی سەربازی و زرێپۆش و پێداویستی لۆجستیان هەڵگرتبوو.

ئەوەی پێویستە بیزانیت: ماوەی چەند هەفتەیەکە چالاکی هێزەکانی هاوپەیمانی نێودەوڵەتیی لە ڕۆژئاوای کوردستان زیادیان کردووە، هاوکات ئۆپەراسیۆنەکانیش زیادیان کردووە، ئەمەش بەگوێرەی زانیارییەکانی ڕوانگەی سووری.