لێدوانی مەسرور بارزانی و سەرۆکی ئەنجوومەنی نوێنەران لەبارەی مووچە

هەواڵ
6 تەممووز

شەیری بکە لە:

لێدوانی مەسرور بارزانی و سەرۆکی ئەنجوومەنی نوێنەران لەبارەی مووچە

کۆبوونەوەی نێوان سەرۆکوەزیران مەسرور بارزانی و مەحموود مەشهەدانی، سەرۆکی ئەنجوومەنی نوێنەرانی عێراق

ئاڤا نیوز

سەرۆکوەزیران مەسرور بارزانی، پێشوازی لە مەحموود مەشهەدانی، سەرۆکی ئەنجوومەنی نوێنەرانی عێراق کرد و هەردوولا هاوڕابوون لەسەر پێویستی چارەسەرکردنی كێشەکانی نێوان هەولێر و بەغدا و تێکەڵ نەکردنی بابەتی مووچە بە کێشە سیاسییەکانی نێوانیان.

چیرۆکی سەرەکی: ئەمڕۆ یەکشەممە، مەحموود مەشهەدانی، لە ڕێگەی فڕۆکەخانەی هەولێرەوە سەردانی هەرێمی کوردستانی کرد و لەلایەن شاخەوان عەبدوڵڵا، جێگری سەرۆکی ئەنجوومەنی نوێنەران و ڕێبەر ئەحمەد وەزیری ناوخۆوە پێشوازی لێکرا، دواتر سەردانی سەرۆکوەزیران مەسرور بارزانی کرد.

ڕاگەیێنراوی فەرمی: دوای کۆتایهاتنی کۆبوونەوەکەش حکومەتی هەرێمی کوردستان ڕاگەیێنراوێکی لەوبارەیەوە بڵاوکردەوە: سەرۆکوەزیرانی هەرێمی کوردستان لەگەڵ سەرۆکی ئەنجوومەنی نوێنەرانی عێراق، گفتوگۆیان لەبارەی گرنگیی چارەسەرکردنی کێشەکانی نێوان هەرێمی کوردستان و حکومەتی فیدراڵ، بە تایبەتی بابەتی مووچە و شایستە داراییەکانی مووچەخۆرانی هەرێمی کوردستان کرد.

٠ هەردوولا هاوڕابوون لەسەر ئەوەی نابێت بە هیچ شێوەیەک، بابەتی مووچە، تێکەڵ بە هیچ کێشە و ناکۆکییەکی سیاسی بکرێت و مووچەخۆرانی هەرێمی کوردستان نابێت باجی ئەو ناکۆکییانە بدەن، کە بەشێوەیەکی نادادپەروەرانە مامەڵە لەگەڵ خەڵکی کوردستان کراوە.

٠ هاوکات جەخت لەسەر ئەوە کراوەتەوە پێویستە بەزووترین کات کێشەی مووچە چارەسەر بکرێت، شایستە داراییەکانی هەرێمی کوردستانیش بنێردێت.

لەلایەکی دیکەوە: سەرۆکوەزیران لە درێژەی پەیامەکەیدا ڕایگەیاند، گفتوگۆی نێوان حکومەتی فیدراڵ و هەرێمی کوردستان بەردەوامە بۆ ئەوەی لەم چەند ڕۆژە دا کێشەکان چارەسەر بکرێن.

٠ هەروەها جەخت لەسەر پێویستی ڕیزگرتن لە سیستمی فیدراڵیی عێراق و مافە دەستوورییەکانی قەوارەی هەرێمی کوردستان کراوەتەوە.