ئاڤا چیرۆکی کۆچبەرێکی دیپۆرتکراوەی ڕێگای ئەورووپا لە لیبیاوە بڵاو دەکاتەوە

ئاڤا نیوز

لەدوای دەستگیرکردنیان بۆ ماوەی نزیکەی 80 ڕۆژ حەوت کۆچبەری کوردی خەڵکی هەرێمی کوردستان بەرەبەیانی پێنجشەممە 10ـی تەمموز لەڕێگەی فڕۆکەخانەی نێودەوڵەتی هەولێرەوە گەیشتنەوە کوردستان.

چیرۆکی سەرەکی: ژمارەیەک کۆچبەر لەمانگی 4ـی ئەمساڵ بەمەبەستی گەیشتن بەوڵاتانی ئەورووپا لەڕێگەی ووڵاتی میسرەوە دەچنە وڵاتی لیبیا، لەپاش 24 کاتژمێر گەیشتنیان بەلیبیا دەستگیر دەکرێن.

لێدوانی فەرمی: دیاری محەممەد، یەکێکە لەو گەنجە کۆچبەرانە بە ئاڤای وت، نزیکەی 19 ڕۆژ لە ژووری تاکەکەسی دابوون و ئەشکەنجەیەکی زۆر دراون، دواتر گوازراونەتەوە بۆ زیندانی دیکە و تۆمەتی ئەندام بوونی داعشیان بۆ هەڵبەستوون.

دیاری زیاتر دەڵێت، "لەزیندان 60 ڕۆژ تەنیا مەعكەڕۆنیمان پێدراوە ئەو ئاوەشی کە پێیان دەداین تەنیا بۆنی تەنەری لێدەهات و دۆخمان زۆر خراپ بوە، ئەم کۆچبەر گەنجە ئاماژەی بەوەشکرد، ڕۆژێک لەڕۆژان بیرمان لەوە نەکردووەتەوە ئازاد بکرێین و بگەرێینەوە کوردستان". 

لەلایەکی دیکەوە: باوکی دیاری دەڵێت، ''45 شەو لەکوڕەکەیان بێ هەواڵ بوون، دواتر تەنیا بۆ یەک تەلەفۆن و هەواڵ پرسینی کوڕەکەیان، 51 وەرەقەیان داوە تا یەک خولەک قسەی لەگەڵ بکەن، باوکی دیاری وتیشی، قاچاخچیەکان دەیان درۆیان لەگەڵ کردوون و هەڵیان خەڵەتاندوون، ئەو قسانەی سەرەتا کردیان هەمووی ناڕاست بوو.