هەشت هەزار پارچە زەوی لە ئیدارەی سۆران دابەش دەکرێن

ئاڤا نیوز

قۆناغی یەکەمی دابەشکردنی زەوی لە ئیدارەی سەربەخۆی سۆران دەستپێدەکات، هەشت هەزار زەوی بەگوێرەی خاڵ دابەشدەکرێت، لە سنووری سێ قەزا فەرمانبەر و خانەنشینان سوودمەند دەبن.

وێنە گەورەکە: 26 هەزار فەرمانبەر و خانەنشین لە سنووری ئیدارەی سەربەخۆی سۆران لە وەرگرتنی زەوی سوودمەند دەبن، بەهۆی هەڵکەوتەی جوگرافی سنوورەکە زەوی پێویست لەبەردەست نییە، بۆیە چاوەڕێی وەزارەتی شارەوانی دەکەن بۆ دۆزینەوەی ڕێگە چارەیەک.

لێدوانی فەرمی: خەسرەو ئیسماعیل، بەڕێوەبەری گشتیی شارەوانییەکانی سۆران بە ئاڤای گوت، "لە سنووری قەزاکانی ڕواندز، خەلیفان و چۆمان لەماوەی 10 ڕۆژی داهاتوو هەوڵدەدەین دەست بە دابەشکردنی ژمارەیەک پارچە زەوی بکەین، بەگوێرەی خاڵ سوودمەندبووان زەوییان پێدەدرێت."

زانیاریی زیاتر: 18 هەزار کەس دەمێنن کە زەوی لە سنووری ئیدارەی سەربەخۆی سۆران وەربگرن، بەڕێوەبەرایەتی گشتیی شارەوانییەکانی سۆران نووسراوێکی ئاراستەی وەزارەتی شارەوانی کردووە، بۆ ئەوەی ڕەزامەندی نیشان بدرێت یان ئەوەتا نەخشەی کەرتی لە شوێنێکی دیکە دابنرێت، یانیش لەسنووری نزیکترین قەزا لە پارێزگای هەولێر زەوی وەرگرن.