ئاگر لە ناوەندی چوارەم گەورەترین شاری تورکیا نزیک دەبێتەوە

ئاڤا نیوز

ئاگری دارستانەکانی تورکیا هێشتا کۆنتڕۆڵ نەکراوە و تا دێت ئاگرەکە زیاتر تەشەنە دەکات، لە ناوەندی  شاری بۆرسا نزیک بووەتەوە.

چیرۆکی سەرەکی: بەهۆی ئاگرکەوتنەوە زیاتر لە سێ هەزار و 500 کەس ماڵەکانیان لە ناوچەکانی دەوروبەری بۆرسا لە باکووری ڕۆژئاوای تورکیا چۆڵکرد و هێشتا ئاگرەکە بەردەوامە.

لێدوانی فەرمی: ئیبراهیم یوماکلی، وەزیری کشتوکاڵ و دارستانەکانی تورکیا ڕایگەیاند،  سێ هەزار و 515 هاوڵاتیمان لە شوێنی ئاگرکەوتنەکانەوە گواستووەتەوە ناوچە ئارامەکان، هاوکات دوو هەزار و 300 کارمەندی ئاگرکوژێنەوە و 850 ئوتومبێل و شەش فڕۆکە و چوار هێلیکۆپتەر بۆ کۆنتڕۆڵکردنی ئاگرەکە تەرخان کراون.

لەلایەکی دیکەوە: ڕەجەب تەیب ئەردۆغان، سەرۆککۆماری تورکیا ڕایگەیاند، لە سەرەتای هاوینەوە تا ئێستا زیاتر لە سێ هەزار ئاگر لە تورکیا کەوتوونەتەوە.

زانیاریی زیاتر: لە قەزای سەفرانبۆلوی سەر بە پارێزگای قەرەبووک کە 72%ـی ڕووبەری زەوییەکەی بە  دارستان داپۆشراوە ماوەی پێنج ڕۆژە هەوڵەکان بۆ کوژراندنەوەی ئاگرەکان بەردەوامن زیاتر لە هەزار و 800 کەس ناچاربوون ماڵەکانیان چۆڵبکەن.