ڕاپۆرتی تایبەت بە هەژاری لە عێراق و هەرێمی کوردستان بڵاودەکرێتەوە

ئاڤا نیوز

وەزارەتی پلاندانانی عێراق ڕایگەیاند، سبەی چوارشەممە دەرئەنجامی ڕاپۆرتی تایبەت بە هەژاری لە عێراق و هەرێمی کوردستان بڵاودەکاتەوە، ئاشکراشی دەکات کە ڕاپۆرتەکە بە هاوکاری نەتەوە یەکگرتووەکان ئامادە کراوە.

ئەوەی پێویستە بیزانیت: بەگوێرەی وەزارەتی پلاندانانی عێراق ساڵی 2022 ڕێژەی هەژاری لە وڵاتدا 24% بووە، بەڵام ساڵی ڕابردوو ڕێژەکە بۆ  17.5% دابەزیووە، بەمەبەستی زیاتر دابەزاندنی ئەو ڕێژەیەش وەزارەتەکە ستراتیژییەکی پێنج ساڵەی ڕاگەیاندووە و دەیەوێت لەو ماوەیەدا ڕێژەکە بگەیێنێتە 10%.

ڕاگەیێنراوی فەرمی: وەزارەتی پلاندانانی عێراق ڕایگەیاند، ڕاپۆرتی نیشتیمانی تایبەت بە هەژاریی سبەی چوارشەممە ڕادەگەیێنرێت کە دەستەی ئاماری فیدراڵ بە هاوکاری دەستەی ئاماری کوردستان ئامادەی کردووە، هاوکات نەتەوە یەکگرتووەکان و تیمی ئۆکسفۆردیش بۆ گەشەپێدانی مرۆیی پشتیوانی ئامادەکردنی ڕاپۆرتەکە بوون.

بڕیارە لە کۆنگرەی ڕاگەیاندنی دەرئەنجامەکانی هەژاریی، محەممەد تەمیم وەزیری پلاندانان، بریکاری وەزارەتەکان، سەرۆکی زانکۆکان، باڵیۆزی وڵاتانی بیانی و نوێنەری ڕێکخراوە نێودەوڵەتییەکان ئامادە بن.