کێشەی چاپی پاسپۆرت لە هەولێر چارەسەر کرا

ئاڤا نیوز

دوای وەستانی کاتیی کاری چاپکردنی پاسپۆرت لە نووسینگەی دووی پاسپۆرتی هەولێر، هەردوو بەڕێوەبەرایەتیی پاسپۆرتی هەولێر و بەڕێوەبەرایەتیی گشتیی باری شارستانی و پاسپۆرت لە بەغدا، لە دوو ڕاگەیێنراوی جیادا ڕایدەگەیێنن کێشەکە چارەسەر کراوە و هاووڵاتییان دەتوانن پاسپۆرتەکانیان وەربگرنەوە، هاوکات هۆشداریی دەدەن لە بڵاوکردنەوەی هەواڵی بێ بنەما.

ڕاگەیێنراوی فەرمی: بەڕێوەبەرایەتیی پاسپۆرتی هەولێر ڕایگەیاند، ئەو دەنگۆیانەی کە باس لەوە دەکەن هۆکاری کێشەکە "چوونەناوەوەی جورجێک بووە بۆ ناو ئامێری چاپکردنەکە" دوورە لە ڕاستییەوە و کێشەکە تەکنیکی بووە و لە ماوەی کەمتر لە 6 کاتژمێردا چارەسەر کراوە.

لەهەمان کاتدا: پاسپۆرتی هەولێر داواشی لەو هاووڵاتییانە کرد کە لە ماوەی 48 کاتژمێری ڕابردوودا مامەڵەیان ئەنجامداوە، سەردانیان بکەن بۆ وەرگرتنەوەی پاسپۆرتەکانیان.

لەلایەکی دیکەوە: بەڕێوەبەرایەتیی گشتیی باری شارستانی و پاسپۆرت و نشینگە لە بەغدا، بڵاوکردنەوەی ئەم هەواڵانەی بە "هەوڵێک بۆ ناوزڕاندنی ناوبانگی بەڕێوەبەرایەتییەکە و کەمکردنەوە لە دەستکەوتەکانی" ناوبرد و جەختی کردەوە کە هەواڵەکان "بە تەواوی دوورن لە ڕاستییەوە."

زانیاریی زیاتر: بەڕێوەبەرایەتییەکە دەڵێت، "مافی خۆی دەپارێزێت لە گرتنەبەری ڕێکاری یاسایی" بەرامبەر بەو پەیج و ماڵپەڕانەی کە ئەم جۆرە دەنگۆیانە بڵاودەکەنەوە.