هەر کەسێک بەشەخۆراک وەرنەگرێت ناوی لە پسوولەی خۆراک دەسڕێتەوە

ئاڤا نیوز

بەڕێوەبەرایەتیی بازرگانی و خۆراکی هەولێر ئاگادارییەک ئاراستەی بریکارەکانی خۆراک و ئەو کەسانەش دەکات کە ناچنەوە بۆ وەرگرتنی بەشەخۆراکی مانگانەیان.

ڕاگەیێنراوی فەرمی: بەڕێوەبەرایەتیی بازرگانی و خۆراکی هەولێر ڕایگەیاندووە، ئاگاداری سەرجەم بریکارەکانی خۆراک دەکەینەوە، لیژنەیەک پێکهێنراوە لەلایەن چاودێری بازرگانی عێراق، لەناکاو سەردانی بریکارەکانی خۆراک دەکەن، هەر بریکارێک لە شوێنی دابەشکردنەکەی دوکان بێت یان ماڵ، بەشەخۆراکی مانگەکانی پێشووتری لێ ببینرێت، دەستی بەسەردا دەگیرێت.

زانیاریی زیاتر: بەڕێوەبەرایەتییە ئاگاداریی هاووڵاتییانش دەکاتەوە، هەر کەسێک کەمتەرخەم بێت لە وەرگرتنەوەی بەشەخۆراکی مانگانەی ناوی لە پسوولەی خۆراک دەسڕێتەوە، هەر بریکارێکیش خۆراکی مانگانە لای خۆی بهێڵێتەوە ناوی لە پسوولەی خۆراک دەسڕێتەوە. 

ئەمەش بزانە: لیژنەیەک پێکدەهێنرێت بۆ لێکۆڵینەوە لە کوالێتی بەشەخۆراک و پرسیار لە ماڵان دەکەن و کێشە و گرفتەکان تێبینی دەکەن لای خۆیان.