تەق تەق لۆبیای هەموو عێراق دابین دەکات

ئاڤا نیوز

بەرهەمی لۆبیای ناحیەی تەق تەق دەگاتە هەموو شارەکانی عێراق و پێداویستییەکانی ئەو شارانە دابین دەکات، ئەمەش بەپێی گوتەی بەڕێوەبەری کشتوکاڵی تەق تەق.

وێنە گەورەکە: چەند ساڵێکە حکومەتی هەرێمی کوردستان ستراتیژیەتی بایەخدان بە کەرتی کشتوکاڵی پەیڕەو کردووە، بەرهەمە ناوخۆییەکان جگە لەوەی هەناردەی شارەکانی عێراق دەکرێن، هەناردەی وڵاتانی دەرەوەش دەکرێن.

لێدوانی فەرمی: سەباح عوسمان، بەڕێوەبەری کشتوکاڵی تەق تەق بە ئاڤا نیوزی گوت: تەنیا لەناو ناحیەی تەق تەق زیاتر لە 250 دۆنم زەوی بە لۆبیا داچێنراوە، ڕۆژانە 100 تۆن دێتە ناو عەلوەیەكی تەق تەق، بەڵام هەندێ ڕۆژ ئەو ڕێژەیە زیاد دەکات بۆ 250 تۆن لەڕۆژێکدا و هەناردەی هەموو شارەکانی عێراق دەکرێن و پێداویستی هەموو شارەکانی ناوەڕاست و خواروو دابین دەکات.

ئەوەی پێویستە بیزانیت: لۆبیا لە سەرەتای وەرزی هاوین دەچێنرێت و بەرهەمەکەی بەردەوام دەبێت تا مانگی 10 بۆ 11، هەر کرێکارێک کیلۆیەک لۆبیا بە 300 دینار لە کێڵگەکان لێدەکاتەوە و دەیهێنێتە عەلوە بە 900 تا هەزار دینار دەیفرۆشێت.