ترەمپ لە هەڵبژاردنە ناوخۆییەکانی نێڤادا سەرکەوتنی بەدەستهێنا

ئاڤا دیجیتاڵ

دۆناڵد ترەمپ، سەرۆکی پێشووی ویلایەتە یەکگرتووەکانی ئەمریکا و یەکێک لە بەربژێرەکانی کۆمارییەکان بۆ سەرۆکایەتی ئەمریکا، لە هەڵبژاردنە ناوخۆییەکانی حیزبەکەی لە نیڤادا سەرکەوتنی بەدەستهێنا، بەوەش  هەنگاوێکی دیکە نزیک بووەوە لەوەی ببێتە تاکە بەربژێری کۆمارییەکان بۆ سەرۆکایەتیی ئەمریکا. 

چیرۆکی سەرەکی: لە هەڵبژاردنە ناوخۆییەکەی پارتی کۆمارییەکان لە ویلایەتی نێڤادا، دۆناڵد ترەمپ توانیویەتی 98%ی دەنگەکان بە دەست بهێنێت. چاوەڕێ دەکرێت بشتوانێت سەرجەمی 26 نوێنەرەکانی ویلایەتەکە بباتەوە. 

زانیاریی زیاتر: نیکی هەیلی، ڕكابەری ترەمپ لە ناو کۆمارییەکان بەشداریی لەم هەڵبژاردنە ناوخۆییەی پارتەکەی لە نێڤادا نەکرد، ترەمپ پێشتریش توانیبووی لە ڤێرجین ئایلەند، نیووهامشایر و ئایۆوا سەرکەوتوو بێت.

ئەوەی پێشبینی دەكرێت: هەنگاوی داهاتووی ترەمپ رووبەڕووبوونەوەیەتی لەگەڵ نیکی هەیلی رکابەری لە ویلایەتی کارۆلینای باشوور. 

باکگراوند: پێنجی نۆڤەمبەری ئەمساڵ هەڵبژاردنەکانی سەرۆکایەتیی ئەمریکا بەڕێوە دەچن، بە گوێرەی پێشبینییەکان، ترەمپ و بایدن دەبنە بەربژێری کۆماری و دیموکراتەکان.