بەڕێوەبەری بازرگانی: پێش ئەوەی ئارد بدەینە هاووڵاتیان دەیكەین بە نان

ئاڤا نیوز  

بەڕێوەبەری گشتیی بازرگانی، سەبارەت بە بەشە ئاردی ئەمجارە دڵنیایی دەداتە هاووڵاتیان و دەڵێت گەنمی خۆماڵییە و بۆ نانی تیری و فڕنیش دەبێت.

وێنە گەورەكە: مانگانە لە چوارچێوەی بەشەخۆراکی مانگانە وێڕای سەبەتەی خۆراك، بەشە ئاردیش بە هاووڵاتیان دەدرێت، بەشێكیان بەشە ئاردەكە دەفرۆشنەوە و بەشەكەی دیكەش لە ماڵ و كارگەكان دەیكەن بە نان.

لێدوانی فەرمی: نەوزاد شێخ کامل، بەڕێوەبەری گشتیی بازرگانیی هەرێمی كوردستان بە ئاڤا نیوزی گوت: دابەشكردنی بەشە ئاردی هەرێمی كوردستان لەگەڵ عێراقە و هیچ دواكەوتنێك ڕووی نەداوە، ئێستا دابەشكردنی بەشە ئاردی شەشەم دەستی پێكردووە و بەردەوامە.

زانیاریی زیاتر: پێكهاتەی ئاردەكە، گەنمی خۆمانە و هیچ بابەتێكی هاوردەكراوی تێدا نییە، پێش ئەوەی بیدەین بە هاووڵاتیان لە ئاشەكانی خۆمان تاقی دەكەینەوە و دەیكەین بە نان بۆ ئەوەی لە جۆری ئاردەكە دڵنیا ببینەوە.