سڕبیا داوای هەنار و بەرهەمی کوردستان دەکات

ئاڤا نیوز 

وڵاتی سڕبیا کار بۆ بەهێزکردنی پەیوەندییە بازرگانییەکان  و هاوردەکردنی بەروبوومە کشتوکاڵییەکانی کوردستان دەکات، بەنیازە چەند کارگەیەکیش لە هەرێمی کوردستان بکاتەوە.

 

چیرۆکی سەرەکی: شاندێکی وڵاتی سڕبیا بەسەرۆکایەتیی جێگری پارێزگاری هەرێمی پیرۆت لە هەولێرە و ئەمڕۆ سێشەممە لەگەڵ ژووری بازرگانی هەولێر کۆبووەوە.

ئەوەی پێویستە بیزانیت: قەبارەی ئاڵۆگۆڕی بازرگانیی سڕبیا لەگەڵ عێراق ساڵانە 406 ملیۆن دۆلارە، ئەمەش لەئاستی پێویستدا نییە، بۆیە دەیەوێت پەیوەندییەکی پتەوی بازرگانی لەگەڵ هەرێمی کوردستان دابمەزرێنێت.

لێدوانی فەرمی: گەیلان سەعید، سەرۆکی ژووری بازرگانی و پیشەسازی هەولێر لە کۆنگرەیەکی ڕۆژنامەوانیدا ڕایگەیاند، بڕیارە لە هەرێمی کوردستانیشەوە شاندێک سەردانی وڵاتی سڕبیا بکات. 

 

بابەتی ستراتیژی: شاندی سڕبیا داوای بەروبوومی کشتوکاڵی کوردستانیان کردووە بەتایبەت هەنار کە لە وڵاتانی دەرەوە خواستێکی زۆری لەسەرە، لەگەڵ بەروبوومی دیکەش وەکو پەتاتە و ئاوی خواردنەوە و ..هیتد.

لەلایەکی دیکەوە: شاندی سڕبیا خواستیان بۆ بەهێزکردنی پەیوەندییەکانیان لە سەرجەم ڕووەکانەوە لەگەڵ هەرێمی کوردستان نیشانداوە، بۆ ئەو مەبەستەش بەنیازن چەند کارگەیەک دابمەزرێنن.

 

ئەمەش بزانە: کابینەی نۆیەمی  حکومەتی هەرێمی لەگەڵ دەستبەکاربوونی لە پێنج ساڵی ڕابردوو گرنگییەکی تایبەتی بە کەرتی کشتوکاڵ و بەبازاڕکردنی بەرهەمی خۆماڵی داوە بەتایبەت لە وڵاتانی دەرەوە، تاوەکو ئێستاش بەرهەمەکان ڕەوانەی چەندین وڵاتی عەرەبی و ئەوروپی کراون.