میسر هەوڵی ڕازیکردنی حەماس دەدات

ئاڤا نیوز  

بڕیارە گەڕێکی تری دانوستانەکان لە قاهیرە بەڕێوەبچێت، میسر هەوڵی ڕازیكردنی حەماس دەدات بۆ ئاگربەست.

وێنە گەورەکە: دوای بەڕێوەچوونی کۆمەڵێك کۆبوونەوەی تایبەت بە ئاگربەستی غەززە لە قاهیرە و دەوحە، بڕیارە لە هەفتەی داهاتوو، لە قاهیرە دانیشتنێک بکرێت، لە دانیشتنەكەدا میسر حەماس ڕازی بکات بە پەسەندکردنی مەرجەکانی ئاگربەستەکە. 

ڕاگەیێنراوی فەرمی: ڕادیۆی ئارمی بە پشتبەستن بە سەرچاوەیەکی ئاگاداری ئەو پرسە کە ناوی نەهێنراوە، بڵاویكردووەتەوە: تیمێکی دانوستانکاری ئاستی باڵای ئیسرائیل لە درەنگانی شەوی ڕابردوو 22-08-2024، لە قاهیرە گەڕاونەتەوە. 

زانیاریی زیاتر: ئەم کۆبوونەوەیە دەرنجامی ئەرێنی هەبووە و تایبەت بووە بە دەروازەی سنوری رەفەح. ئەوەش لە دوای ئەوەی دێت کە ئیسرائیل لە مانگی ئایارەوە ئەم سنورەی داگیرکردووە. 

لە لایەکی دیکەوە: ڕادیۆکە باس لەوەش دەکات، قاهیرە دوای دانوستانەکانی دوێنێ دەستپێشخەرییەكەی ئەمریکای پەسەند کرد لە کاتێدا پێشتر ڕەتیکردبووەوە، کە هەفتەی ڕابردوو لەلایەن ئەنتۆنی بلینکن وەزیری دەرەوەی ئەمریکاوە لە دەوحە پێشکەشکرابوو. 

ئەمەش بزانە: بەگوێرەی ڕاپۆرتەکە، دانوستانکارانی ئەمریکی و میسری، کار لەسەر ئەوە دەکەن حەماس ڕازی بکەن بە شێوەیەکی ناڕاستەوخۆ بەشداری لە دانوستانەکانی داهاتوو بکات.