پەرلەمانی عێراق چوار یاسا بەیەک پاکێج پەسەند دەکات و یەکێکیان لەبەرژەوەندی کوردە

ئاڤا نیوز

 

بڕیارە دوای هەڵبژاردنی پەرلەمانی کوردستان ئەنجوومەنی نوێنەرانی عێراق کۆببێتەوە و چوار یاسا بەیەک پاکێج پەسەند بکات، کە یەکێکیان لەبەرژەوەندی کوردە.

 

لێدوانی فەرمی: محەممەد عەنوز، ئەندامی لیژنەی یاسایی پەرلەمانی عێراق بەئاڤا نیوزی ڕاگەیاند: ئەو چوار یاسایەی پەیوەستن بە یەکترەوە و بڕیارە بەیەک پاکێچ دەنگیان لەسەر بدرێت، بریتین لە یاسای لێبوردنی گشتی و یاسای باری کەسیی و یاسای گەڕاندنەوەی خاوەندارێتی موڵک و ماڵی داگیرکراو بەفەرمانی ئەنجوومەنی ناسراو بە "قیادەی سەورە"ــی هەڵوەشاوە و یاسای خانەنشینی حەشدی شەعبی.

 

عەنوز ئاماژەی بەوەش کرد، بەهۆی هەڵبژاردنی پەرلەمانی کوردستان دانیشتنەکانی پەرلەمانی عێراق دواکەوتووە، چونکە زۆربەی فڕاکسیۆنە کوردستانییەکان سەرقاڵی ئەو هەڵبژاردنەن.

 

ئەوەی پێویستە بیزانیت: بڕیاربوو لە دانیشتنی 2-10-2024ـی پەرلەمانی عێراق، دەنگ لەسەر دوو پڕۆژە یاسای پەیوەست بە کورد و شیعە بدرێت، ئەوانیش گەڕانەوەی موڵک بۆ خاوەنەکانیان لە سنووری ماددەی 140 و هەمواری یاسای باری کەسێتی،  بەڵام دانیشتنەکە نەکرا.