پەرلەمانتارێکی عێراق: هێرشی ئیسرائیل بۆ سەر عێراق حەتمییە

ئاڤا نیوز

 

ئەندامێکی لیژنەی پەیوەندییەکانی دەرەوەی پەرلەمانی عێراق ئاشکرای دەکات، هێرشی ئیسرائیل بۆ  سەر عێراق حەتمییە و حکومەتی عێراق ئەمە دەزانێت و ناشتوانێت هیچ بەرگرییەک لەخۆی بکات.

 

لێدوانی فەرمی: موختار موسەوی، ئەندامی لیژنەی پەیوەندییەکانی دەرەوەی پەرلەمانی عێراق بە ئاڤا نیوزی ڕاگەیاند: عێراق و ناوچەکە دەچێتە قۆناغێکی مەترسیدار و گەورە لە چەند ڕۆژی داهاتوودا، عێراق خێرا دەستی بەجووڵە کرد بەرەو کۆمەڵگەی نێودەوڵەتی لە ڕێگەی ناردنی پەیامی جیاوازدا، چونکە دەزانێت هێرشەکە حەتمییە، بۆیەش عێراق هەندێک هەنگاوی پێشوەختەی هێرشەکەی ناوە.

 

لەلایەکی دیکەوە: موسەوی گوتی، حکومەتی عێراق لە بەرامبەر هێرشی ئیسرائیل  ناتوانێت بەرگری لەخۆی بکات، لەبەر ئەوەی سیستمی بەرگریی ئاسمانی پێشکەوتووی نییە کە بتوانێت چاودێریی فڕۆکەی جەنگی یان درۆن یاخود مووشەکی پێشکەوتوو بکات.

 

ئەوەی پێویستە بیزانیت: ئەمڕۆ شەممە، وەزارەتی دەرەوەی عێراق نامەیەکی فەرمی ئاراستەی ئەنجوومەنی ئاسایش، ئەمینداری گشتیی نەتەوە یەکگرتووەکان، کۆمکاری عەرەبی و ڕێکخراوی هاوکاری ئیسلامی کرد سەبارەت بە هەڕەشەکانی ئیسرائیل بۆ سەر عێراق، بۆ ئەوەی ڕۆڵی خۆی لە پاراستنی ئاشتی و ئاسایشی نێودەوڵەتیدا بەجێبهێنێت.