نزیکەی پێنج هەزار مامۆستا و فەرمانبەری کەرکووک زەوی وەردەگرن

ئاڤا نیوز

 

وەزارەتی شارەوانی و گەشتوگوزاری هەرێمی کوردستان وردبینی لە فۆڕمی نزیکەی پێنج هەزار مامۆستا و فەرمانبەری کەرکووک کردووە، بە میکانیزمی جیاواز زەوییان بۆ دابین دەکرێت.

 

وێنە گەورەکە: نزیکەی 8 هەزار فەرمانبەری هەرێمی کوردستان لە فەرمانگەکانی کەرکووک دەوام دەکەن، وەزارەتی شارەوانی بە دوو میکانیزمی جیاواز زەوییان بۆ دابین دەکات. ئەوانەی دەتوانن لە وەرگرتنی زەوی سوودمەند ببن، سەر بە وەزارەتەکانی پەروەردە، شەهیدان و پێشمەرگەن.

 

لێدوانی فەرمی: سەربەست مەولوود، بەڕێوەبەری بەشی یاسایی لە وەزارەتی شارەوانی بە ئاڤای گوت، "ئەو فەرمانبەرانەی شوێنی ئەرک و نیشتەجێبوونیان کەرکووک بێت، دەکرێن بە یەک لیستی جیا و لە نزیکترین سنووری شارەوانیی زەوییان بۆ دابین دەکرێت، ئەوانەی تەنیا شوێنی ئەرکیان لە فەرمانگەکانی کەرکووکە لە شوێنی نیشتەجێبوونیان زەوی وەردەگرن".

 

گۆشەیەکی دیکە: کامەران حەسەن، بەڕێوەبەری خوێندنی کوردی لە کەرکووک بە ئاڤای ڕاگەیاند، "نزیکەی پێنج هەزار و 500 فۆڕمی مامۆستا و فەرمانبەرانی خوێندنی کوردی کە پرۆسەکە دەیانگرێتەوە ڕادەستی وەزارەتی شارەوانی هەرێمی کوردستان کراوە، بۆ ئەوەی زەوییان پێبدرێت".