هەسەدە: هێرشێکی گرووپە چەکدارەکانمان لە بەنداوی تشرین تێکشکاند

ئاڤا نیوز

 

هەسەدە لە ڕاگەیێنراوێکدا ئاشکرای دەکات، شەڕڤانانی ئەنجوومەنی سەربازی لە منبج هێرشێکی چەکدارانی نزیک لە تورکیایان لەنزیک بەنداوی تشرین تێکشکاند و چەند گوندێکی نزیک ناوچەکەشیان کۆنترۆڵکرد کە چەکدارەکان وەک سەرچاوەی هێرشەکانیان بەکاریان دەهێنا.

 

وێنە گەورەکە: ڕۆژی 23-12-2024، ژمارەیەک لە گرووپە چەکدارەکانی نزیک لە تورکیا لەڕێگەی ئۆتۆمبێلێکی بۆمبرێژکراو لە نزیک بەندوای تشرین هێرش دەکەنە سەر هێزەکانی سووریای دیموکرات، بەڵام بەرپەرچی هێرشەکە  دەدرێتەوە و  سەرجەم چەکدارەکانیش دەکوژرێن.

 

ڕاگەیێنراوی فەرمی: ناوەندی هێزەکانی سووریای دیموکرات "هەسەدە" ڕایگەیاند: "هێزەکانمان ئۆپەراسیۆنی گەڕان و پاککردنەوەیان لە زۆرێک لە گوندەکانی دەوروبەری بەنداوەکە دەستپێکرد کە چەکدارانی تورکیا وەک سەرچاوەی هێرشکردنە سەر هێزەکانمان بەکاریان دەهێنا".

 

باکگراوند: لە 11-12- 2024، بە نێوەندگیری ئەمەریکا ئاگربەست لە نێوان هەسەدە و گرووپە چەکدارەکانی نزیک لە تورکیا ڕاگەیێنرا، بەوەی کە هێزەکانی هەسەدە لە مەنبەج کشانەوە و لەبەرمبەدا گرووپە چەکدارەکان هێرش نەکەنە سەر کۆبانێ، بەڵام گرووپە چەکدارەکان پابەندی ئاگربەستەکە نابن و هێرشەکانیان بەردەوامن.